Dawa ka KSU bad IYWSC ban kyntiew kyrdan iaka PHC Iooksi sha ka CHC

Syllad | The Rising MeghalayaSeptember 2, 2020

Ki nongialam ka Khasi Students’ Union (KSU) Iooksi unit ha ryngkat ki dkhot ka Iooksi Youth Welfare Sport Club (IYWSC) ki la leit ban ia kynduh ia u Myntri ka tnad ka koit ka khiah jong ka Jylla, u Bah AL Hek ban dawa kyntiew kyrdan ia ka Iooksi Primary Health Centre (PHC) sha ka Community Health Centre (CHC) haka sngi Balang.

“Ka Iooksi PHC kaba la pynioh ka sorkar naduh u snem 2002 bad kala ai iaka jingshakri ymtang iaka shnong Iooksi hynrei lajan 12 tylli ki shnong kumjuh ki shnong ba marjan kiba don ha khappud ka Jylla Assam bad ka kynthup ruh ia kumba 50 hajar ngut ki nongshong shnong,” la ong u Landarson Sutnga.

Haka dorkhat la pynpaw ruh ba namar ka jingbun ki nongshong shnong katei ka PHC kam shym lah ban ai ka jingsumar kaba paka iaki paidbah naka jingduna Doctor, ki Staff Nurse, nongtrei bad kiwei kiwei.

Kane ka jingduna ki nongtrei ka ktah iaka rukom sumar iaki paidbah namar ki hap ban leit phah sumar ialade sha ki jaka ba jngai kum sha CHC Laskein bad sha Jowai Civil Hospital Ialong.

U Landarson ula ong ba dei halor kane ka nongrim kila dawa na u Myntri ka koit ka khiah ba un sngewbha ban kyntiew kyrdan iakatei ka PHC sha ka kyrdan CHC khnang ba katei ka jaka sumar iaki paidbah kan nang lah ban ai ka jingshakri kaba khambha iaki paidbah.

“Ngi ai ka jingiaroh ia u myntri ka koit ka khiah halor ka jingpynbna jong u ban kyntiew kyrdan ia baroh ki PHC bad CHC dangshen. U Myntri ula pynsngew ruh ha ngi na ka bynta ban pynbha iaka rukom treikam jong ki PHC da kaba kyntiew kyrdan iaki PHC sha ki CHC bad la aiti ha ki DMHO ban jied iaki PHC ban kyntiew kyrdan bad yn jied ruh ia kito kiba la dei hok ban kyntiew kyrdan ,” la ong u Landarson uba long ruh u Publicity secretary KSU Iooksi Unit.

“Naka liang jong ngi, ngi la kyrpad ia u Myntri ban phai khmat nyngkong sha ka Iooksi PHC naka bynta ban kyntiew kyrdan iaka sha ka CHC,” ula ong Landason.