Dawa ka KSU bad JSU na ka Sorkar ban pynlong biang ia ka eksam NEET hapoh Jaintia Hills

Syllad | The Rising MeghalayaMay 8, 2024

Ka Khasi Students’ Union (KSU) bad ka Seng Jaintia Students’ Union (JSU) ha ka 7 tarik Jymmang ki la dawa na ka sorkar Jylla ba ka dei ban pynlong biang ia ka eksam NEET na ka bynta ki samla pule na ka thain Jaintia Hills hadien ki jingkynnoh ai jingkylli bakla ha ka por ba pynlong ia kane ka eksam ha ka 5 tarik mynta u bnai.

Ha ka jingujor sha u Myntri ka Tnat pule puthi ka sorkar Jylla u Rakkam A Sangma ka KSU bad JSU ki la ong, “Da kaba pyrkhat na ka bynta ki hok bad ka bha ka miat jong ki samla pule ki jong ngi, ngi kyrpad na ka bynta ban pynlong biang sa shisien ia kane ka eksam NEET.”

Nalor kata ki la kynnoh ruh ba ki la sakhi ia shibun ki jingleh thurmur bad bakla ha ka por ba pynlong ia ka eksam NEET kaba la long ha ka 5 tarik mynta u bnai ha Jowai, West Jaintia Hills.

“Hooid ngi iaroh ia ka sienjam ba la shim da ka sorkar na ka bynta ban pynlong ia kiba kum kine ki eksam hapoh Jaintia Hills ha ka sien kaba nyngkong, hynrei ngi sngewkhia jur halor ka jingleh bkla kaba la ktah jur ia kumba 400 ngut ki samla pule kiba ialeh ia kane ka eksam.Ngi la ioh ia ki jingtip ba ha ka por ba la pynlong ia ka eksam, ki samla pule ki la ioh pdiang ia ki ar bynta ki jingkylli ba la thoh MNOP bad QRST. Kane ka la pynklumar jingmut hapdeng ki samla kiba ialeh ia kane ka eiksam ha kaba wat ki nongpyniasid ia ka eksam ruh ki sah ha ka umdum ba ia kano ka jingkylli kaba ki dei ban thoh,” ong katei ka jingujor.

Ka jingujor ka la ong ba hadien la pynshai ba ki jingkylli na ka thup jong ka QRST ka dei kaba dei na ka bynta ban jubab, kaba la ktah jur ia ka bor pyrkhat jong ki samla kiba la dep pynlut lypa ia ka por ba kordor ban pyrshang thoh ia ka bynta jong ka MNOP ka bym dei satia ban thoh. Nalor kata wat hapdeng ka jingpyrshang da ki katto katne ki samla pule ban pan jingshai na ki bor ba dei khmih, hynrei kane kam shym la seisoh. Nalor kata ym shym la shah ruh ia ki samla pule ba kin aiti ia ki admit card tad haduh ka por janmiet ha kaba bun ki samla kiba dei na ki jaka ba jngai, kim shym la ioh shuh ban aiti ia ki admit card haduh mynta.

Nalor kata na ka liang kine ki ar seng ki la pynpaw ruh ba kiba bun na kine ki samla pule kiba iakhun ia kane ka eksam ki la pynlut ia ka por bad ka bor ha ki jingpule kumjuh ha ka bor pisa ban pynkhreh ia ka eksam da ka thong ba kin ioh ruh klas ha ki jaka pule medical na ka bynta ban ioh leit pule MBBS.

Kumta khnang ban pynneh ia ka jingleh hok bad ban pynioh ia ki juh ki lad ki kabu na ka bynta baroh ki samla pule, ka long kaba donkam ban pynlong biang ia kane ka eksam NEET bad ban pynbeit ia kine ki jingleh bakla. Kumjuh ki la dawa ban pynpaw ruh ba ka long kaba donkam ban shim ia ki sienjam ban lah ban khanglad ia kiba kum kine ki jingjia ba kin wan jia biang, bad ban khmih ba ka  jingbit jingbiang jong samla pule ka dei kaba kongsan tam ha baroh ki jingpynlong ia ki eksam bapher bapher.