Dawa ka KSU ban iaid da ka lynti kaba khuid bad shai halor ka bhah pule MBBS 

Syllad | The Rising MeghalayaJuly 3, 2024

Ka Khasi Students Union (KSU) ha ka 2 tarik Naitung, ka la kyntu ia ka sorkar Jylla ba ka dei ban pynthikna ba ka jingbhah ia ka MBBS seat ha ki jaka pule bapher bapher lyngba ka bhah jong ka jylla ka dei ban long da ka lynti kaba khuid bad kaba shai.

“Ngi la aiti ia ka memorandum sha ka Myntri ka Tnad ka koit ka khiah ka Dr Ampareen Mazel Lyngdoh ban kyrpad ia ka tnat ba kan pynshai halor ka jingdon jong ki seat ha ki jaka pule doktor bapher bapher kiba hap ha ka bhah jong ka Jylla,” ong u Education Secretary ka KSU u Pynkmenlang Sanmiet lyngba u kyrwoh.

“Ha kajuh ka por, ngi kyntu ruh ia ka tnad ba kadei ban pynthikna ba ka dei ban iaid da ka lynti kaba khuid ha ka jingbhah ia ki MBBS seat,” u la ong.

Nalor kata u la aijingmut ruh halor ka jingdonkam ban kynthup ia ki samla pule Khasi ne Garo kiba kotbor ha ka open category khnang ban plielad ia kiwei pat na ki reserved category ba kin ioh bynta lang ban rung ha ka thup ba la bhah kyrpang na ka bynta jong ki.

“Ka Seng ka la aijingmut ruh ba lada don ki samla kiba la pass ia ka NEET Exam bad kiba poi ha k kyrdan ban ioh ruh sha ka All India Quota, kum ia kita ruh dei ban ailad khnang ba kin don shuh shuh kiwei pat ki samla na ka jylla ki ban ihlad ban leit pyntbit ha ka jingpule doktor,” u la bynrap.

Kumjuh ka KSU ka kyrpad ruh ia ki bor shnong bad hima ba ki dei ban kiar na kaba ai ia ki kot pynshisha lane ki Residential Certificate ia ki bym dei ki paradoh parasnam namar kane ka ktah ia ka bhah jong ki samla pule trai muluk kiba don ia ka jingthmu ban leit pule doktor.

“Kumta ngi kyntu jur ia ka sorkar ba kam dei ban pdiang klumar ia kiba kum kine ki kot ki sla khnang ban pynthikna ba ki briew kiba nabar kin ym shah kynthup satia ha ka thup jong ka bhah leit pule doktor lyngba ka bhah jong ka jylla,” ong shuh shuh u nongialam ka Seng.