Dawa ka KSU ban khang ia ka jingdie bad pynbthei pataka ha ka Diwali

Syllad | The Rising MeghalayaOctober 31, 2024

Ka Khasi Students’ Union (KSU) ha ka 30 tarik u Risaw ka la dawa na ki bor pyniaid District ka East Khasi Hills ba kan khang ia ka jingdie bad ka jingpynbthei ia ki bom pataka ha kane ka jinglehkmen Diwali ka ban wan.

Ha ka shithi sha ka Deputy Commissioner, ka Kong RM Kurbah, u Environment Secretary ka KSU u Shiningstar Kharbihkhiew u la ong, “Nga kyrmen skhem ba phin shim ia ki sienjam kiba donkam na ka bynta ban iada ia ka bha ka miat jong ka District ka jong ngi bad ban kyntiew ia ka jingrakhe Diwali ka bym ktah ia ka koit ka khiah bad ka  mariang.”

“Katba ka tamasa ka dei ka bynta jong ka jinglehkmen kaba kyrpang jong kiba bun ki nongshong shnong jong ka ri India jong ngi kumjuh jong ki nongshong shnong ki bym dei ki trai shnong riewlum jong ka Jylla Meghalaya, hynrei ka jingktah kiba mih na kane ka jingpynbthei bom pataka ia ka mariang bad ka koit ka khiah jong ki paidbah ka la nang jur bad kaba la wanrah shibun ka jingsngewkhia,”ong ka shithi.

Manla u snem ka jingpyndonkam palat ia kine ki bom pataka ha ka por Diwali ka la lam ruh sha ka jingkiew ka jingjakhlia jong ka lyer bad kaba ktah jur ia ki nongshong shnong khamtam kito kiba shem shitom ha kaba iadei bad ka jingring bad pynhiar mynsiem.

U la ong ruh ba ki kynja chemical ne dawai kiba ktah kiba mih lyngba kine ki bom pataka ki nangktah jur ia ka koit ka khiah jong ki riew tymmen, ki khunlung khynnah bad ki jingri jingdup.  Kumjuh ka jingsawa kaba mih na ka jingbthei jong kine ki bom ka ktah ruh ia kito kiba don ka jingbym lah shah ia ki jingsawa bad ktah ruh ia ki mrad bad ki sim ki doh bad ki jingri kiba ri ha iing.

Kumjuh ka jingpyndonkam ia ki pataka ka lam ruh sha kiba bun ki jingbym shngain, kynthup ki jingmynsaw na ki jingbakla bad ruh wat ki jingpluh ding kiba ryngkhat bad ka ban nang ban khia ia ka jingshakri jong ki tnat Emergency.

“Kumta da kaba pynshong nongrim halor kine ki jingktah ka jingkhang pyndonkam ba shipor ia ka jingdie bad pynbthei pataka ha kane ka por kan long ka sienjam kaba kongsan ha ka jingrakhe ia ka Diwali kaba koit ba khiah, ka bym ktah ia ka mariang bad kaba shngain. Bun ki nongshong shnong bad ki kynhun hapoh ki shnong ki thaw ki kyrshan ia ki jinglehkmen da kiwei pat ki lad ki lynti kum ka jingthang da ki mombati, sharak bad ki jingleh jingkam tynrai kiba pynneh ia ka mynsiem lehkmen khlem da donkam ban pynsniew ne ktah ia ka mariang,” u la bynrap.