Dawa ka KSU ban pynioh kham kloi ia ka traffic branch ha East Jaintia Hills

Syllad | The Rising MeghalayaDecember 9, 2023

Ka Khasi Studnts’ Union (KSU) Khliehriat Town Unit bad ka Ladrymbai Unit ha ka 8 tarik Nohprah,  ki la leit iakynduh ia u Additional Superintendent of Police, East Jaintia Hills u Bah Banraplang Jyrwa uba khmih ruh ia ka tnat pyniaid kali (Traffic) namar ka jingjur palat ka jingdheng kali kaba man la ka sngi ha ki bynta jong ka iew Ladrymbai bad iew Khliehriat kaba sdang naduh ka por mynstep haduh ka por janmiet.

Ka KSU ka pynkynmaw ruh ba dang ha kine ki kyndiat bnai bala leit ka la dep ban ai da ka dorkhat bad pynsgew sha u Myntri ka Tnat kam pohiing u Bah Prestone Tynsong ban dawa na ka bynta ban wanrah noh da ka Traffic Branch hapoh District khnang ba lah ban tehlakam bha ia ka rukom pyniaid kali hapoh district, hynrei sngewsih ba haduh mynta ka sorkar ka khlem leh eiei halor kane ka bynta .

Haba iakren bad u Additional SP halor kane ka bynta, une u heh pulit u la  pynsngew ba ia kane ka mat na ka liang ka jong ki ruh, ki la ju dawa ia kane.

Na ka liang ka Seng lyngba u samla Chanky Shylla, General Secretary ka KSU Ladrymbai unit bad u Samla Kyrshan Dkhar President Khliehriat town Unit ki la ai jingmut ia ka tnat traffic cell ban tehlakam ia ka jingjur palat ka dheng kali ha ka district headquarter bad iew Ladrymbai da kaba pynmih ia ka jingai jingmut lane ka hukum ban pyniaid  noh ia ki trok thylli na ka surok bypass Ladrymbai PWD khnang ban lait na ka dheng kali ba ha ka por mynsngi ha Ladrymbai bad Khliehriat.

Kane ka long ruh namar kane ka jingdheng kali ka la ktah shisha ia ka iaid ka ieng jong ki paidbah bad ia ki khynnah skul bad khamtam ruh ia ki kali pynlip ding bad ki kali ambulance kiba kit nongpang na kawei ka jaka sha kawei pat kaba lah ruh ban wanrah ia ka jingjia ba sngewsih tang namar ka jingdheng kali.

Ia kane ka KSU ka la ai jingmut ban leh shwa kum ka jingpyrshang bad ban peit kumno kan treikam. Ka KSU ka iai ban ba ka Traffic branch ka dei ban don noh ha district khnang ba ki paidbah ka thain kin lait noh na ka jingshah ktah.