Dawa ka KSU ban pynsangeh pynkupbor ia ka IMA ban thied jaka ia ki nongseng kam ha ka Jylla

Syllad | The Rising MeghalayaDecember 13, 2024

Ka Khasi Students’ Union (KSU) ha ka 12 tarik Nohprah ka la dawa na ka sorkar Jylla ba ka dei ban pynsangeh noh ia ka amendment jong ka Meghalaya State Investment Promotion and Facilitation Act, 2024 ka ban pynkupbor ia ka Investment Meghalaya Agency (IMA) ba kan thied bad ai jaka sha ki nongseng kam seng jam namar ka long pyrshah ia ka jingthmu jong ka Meghalaya Land Transfer Act.

Haba kren sha ki lad pathai khubor, u General Secretary ka KSU u Samla Donald V Thabah u la ong, “Ngi kwah ban phah ia ka khubor kaba shai sha ka sorkar Jylla ba ka dei ban kren shai halor kane, bad kumno kan pynmyntoi ia ki nongshong shnong ka Jylla. Lada ka sorkar kam lah ban leh ia kata, kumta ruh ka dei ban pynsangeh bad pynduh noh ia kane ka Act.”

U la ong ba ka sorkar Meghalaya ka la pynkylla ia ka Meghalaya State Investment Promotion and Facilitation Act 2024, kaba la aibor ia ka Investment Meghalaya Agency (IMA) na ka bynta ban thied jaka bad ban ai jaka sha ki nongseng kam seng jam ne ki kompeni, kata ha ka rukom ka bym shai satia la ki dei kiba na shabar ka Jylla lane kiba napoh ka Jylla.

“Kaei kaba ngi sngewthuh hangne ka long ba kum kane ka amendment kam long satia kaba iaid katkum ka Meghalaya Land Transfer Act.Ka Meghalaya Land Transfer Act ka don ban iada ia ki hok jong ki paid riewlum ka jylla ha kaba iadei bad ka khyndew ka shyiap. Hynrei, ha kaba iadei bad kane ka Act, ka IMA kan thied ia ki jaka bad aiti sha ki nongseng kam seng jam shimet khlem da iasyllok bad ki Dorbar Shnong ne KHADC, JHADC bad GHADC haba ka Jylla ka hap hapoh ka Sixth Schedule” ula ong.

“Kumta ruh ngi na ka liang ka KSU sngi sngew ba kum kane ka jingpynkylla ia ka ain kan ktah ia ka bha ka miat jong ki paid riewlum ka jylla bad kane kan lam ruh sha ka jingshim ia ki jaka puta jong ki paid riewlum.Nalor kata, ngi iohi ba ka jingpynmih ia ka kyntien nongseng kam kim shym la pynshai lane kren shai la kine ki dei ki riewlum na ka jylla ne ki kompeini shimet kiba na shabar ka Jylla.Mynta lada ki kompeni shimet ki wan na shabar ka Jylla bad sdang ia ka sengkam seng jam ha ka jylla jong ngi, mano man ioh nong na kata,?” u la bynrap.

Nalor kane une u nongialam ka KSU u la ong ruh ba ka jylla kam shym la don satia ia ka policy ka ban pynthikna halor ka ioh kam ioh jam hapdeng ki samla riewlum ka jylla ba kine ki kompeni shimet, kata ym kumba long ha kiwei pat ki jylla kum ha Haryana, Andhra Pradesh, Maharashtra bad Jharkhand kiba la don ia ki policy ha kaba ki kompeni shimet kiba wan seng kam ha kine ki jylla kin hap ban pynthikna ba 75% na ki kam ki jam ki dei ban bhah sha ki trai shnong jong ka Jylla.