Dawa ka KSU ban weng mardor ia ki ktem beain ki BSF bad buh da ki khyrdop talasi bathymmai

Syllad | The Rising MeghalayaSeptember 18, 2023

Ka Khasi Students’ Union (KSU) ka la dawa ia ka sorkar jylla ba kan weng noh mardor ia ki ktem beain jong ki shipai BSF hapoh ka shnong Sonapyrdi, Ratacherra bad Hingaria bad ban thaw da ki khyrdop talasi bathymmai ne ka Infiltration Check Gate ha ka surok National Highway-6 hapoh  East Jaintia Hills District.

Ka KSU ka la ong ruh ba ka jingshah pyniap dusmon jong ka longkmie ha ki suba khar Bangladesh ha kine ki khyndiat sngi ba la dep ka la wan long namar ka jingbym lah treikam jong kine ki khyrdop talasi (check gate) hapoh ka thain ha kaba ki poiwir da kaba suk ki ioh ban wan rung laitluid, kata khamtam ka khyrdop hapoh Tongseng kaba la wanrah ruh ka jingsngewkhia kaba jur halor ki kam shongshngain hapoh ka thain.

Halor kane ka KSU ka la aiti ruh da ka memorandum sha u Symbud Myntri Rangbah uba dei u in-charge Home (Police) u Bah Prestone Tynsong ha ka sngi Nyngkong ka KSU-EJHD ba un shimkhia mardor halor kane ka bynta.

Ka KSU ha u kyrwoh lyngba u president u Streamly N Suchen ka la ong, “Ngi kyntu jur ban weng noh mardor ia kine ki ktem beain jong ki BSF bad pynkynriah noh sha ki thain khappud kiba pajih jong ka ri bad ruh ban shim ia ki sienjam pyrshah ia ki kam lehbor ki jong ki khnang ban weng ia ki jingeh jong ki paidbah nongshong shnong kiba shong ba sah hapoh u pud u sam jong kine ki ktem shipai BSF hapoh Sonapyrdi, Ratacherra, bad Hingaria.”

U la ong ba ka KSU ka la ioh pdiang ia shibun bah ki jingujor halor ki kam leh donbor bad ki kam jrongkti jong ki shipai BSF ha ki bynta ba marjan jong ka lynti surok NH-6. U Suchen u la ong ba ha ka 2 tarik u Lber mynta u snem, ka kynhun ki shipai BSF kiba don ha ka uniform ki la thombor ia uwei u khynnah skul jong ka shnong Huroi katba u dang don ha ka lynti ban leit sha skul.

“Kane ka jingjia ka la pynlong ia ki nongshong shong ba kin don hapdeng ka jingsyier, bad kane ka la pynlong ruh ia ki nongshong shnong ba kin pynrem jur ia kane ka kam leh donbor jing ki BSF,” ong u nongialam ka KSU.

Nalor kata u la ong ruh ba ki kam lehnoh jong ki BSF ki la wan jia ruh lyngba kiba bun ki kam lehbor, kata kynthup naduh ka jingtohkit ba khlem nongrim, ka jingtalasi ba khah khah ia ki kali bad ka jingpyntieng pynsmiej ia ki trai shnong kaba la buh jingsyier shibun ia ki paid nongshong shnong.

Ka KSU ka la dawa ruh na ka sorkar jylla ba kan thaw shuh ia ka khyrdop talasi ha ka lynti surok NH-6 khamtam hapoh Tongseng khnang ban lah ban tehlakam ia ka jingwan rung kyrthep jong ki mynder na ki bynta ba marjan ka Bangladesh.

Shuh shuh u Suchen u la ong ruh ba ka KSU Narpuh Circle dang shen ka la ioh ban kem noh ia kine ki khar Bangladesh kiba ioh ban wan rung laitluid na ki jaka khlaw ka Kuliang da kaba jam lyngba ia ki jaka khappud.

Kumta khnang ban aijingiada ia ki nongshong shnong jong ka EJH bad ban pyrkhing ia ki jaka khappud, ka KSU ka kyrpad jur ia une u myntri ba un tuklar lem da kaba buh ia ki khyrdop talasi kiba thymmai khamtam hapoh Tongseng kaba jur eh ka jingwan rung beain jong ki briew kiba na bar.