Dawa ka KSU ia ka NEIGRIHMS ban shah ia ki trai shnong riewlum ban ialeh ia ki eksam thep kam ha la ka jong ka jylla

Syllad | The Rising MeghalayaDecember 7, 2023

Ka Khasi Students’ Union (KSU) haka 6 tarik Nohprah, ka la kyntu ia ki bor pyniaid ka North Eastern Indira Gandhi Regional Institute of Health and Medical Sciences (NEIGRIHMS) ba kin ailad bad shah ia ki trai shnong riewlum ka jylla ba kin thoh ia ki eksam thep kam katkum ka jingangnud ka jong ki.

Ka kynhun ki nongmihkhmat ka KSU ka la iakynduh bad aiti ruh da ka jingthoh ha u Director, NEIGRIHMS u Prof (Dr.) Nalin Mehta ban pynpaw ka jingsngew bynniaw kaba jur halor ka rukom thungkam na ka bynta ki post Group B bad C hapoh kane ka jaka sumar.

Katkum ka shithi la ong ba ka seng ka sngewkhia jur ban tip ba kiba bun ki nong aplai kam kiba dei ki trai shnong riewlum ka jylla Meghalaya, kata kiba thep ia ki kam Group B bad C ba ki la hap ban leit ialeh ia ki eksam sha ki centre kiba hap sha kiwei pat ki jylla.

“Ka la don ka jingsngew bynniaw kaba jur hapdeng ki nong aplai kam kiba dei ki trai shnong riewlum ba la pynngat khnang ba kin leit ialeh ia ki eksam jong ki sha kiwei pat ki jylla khnang ban khanglad ia ki ba kin shah pynhap ia ki kum ki nong aplai ki bym dei ki trai shnong na ka bynta kine ki post,” ong u General Secretary ka KSU u samla Donald V Thabah uba la bynrap ruh ba ka Seng ka la lap ba kane kam dei satia ka sien kaba nyngkong ba ki nong aplai kam kiba dei ki trai shnong riewlum ka jylla ki hap ban leit ialeh ia ki eksam shabar ka jylla, kata ia kaba ka Seng kan ym lah ban ailad ba kane ka rukom treikam kan dang iai bteng hadien habud.

U la ong ruh ba ka KSU ka kyntu jur ia ki bor ba dei khmih ba ki dei ban sngewthuh ba kiba bun na ki nong iakhun kam na ka jylla ki dei kiba wan na ki longiing kiba kham duna ha ka liang ka ioh ka kot bad kaba pynshem shitom shibun ia ki ba kin leit sha kiwei pat ki jylla ban ialeh ia ki eksam jong ki bad kaba long ruh ka jingkhanglad ia ki ban pynioh ia kajuh ka hok.

Nalor kata ka KSU ka pynpaw ruh ba ka tarik ban pynmih ia ki admit card na ka tarik ban ialeh ia ki eksam ka long tang khyndiat sngi, kata wat na ka bynta kito kiba lah ban pynlut ha ka leit ka wan bad ka shong ka sah namar ka jingkhim palat jong ka por.

Kumjuh, ki don ki nongaplai kiba thep ia buntylli ki post ha ka Grade B bad C bad ia baroh ki eksam na ka bynta baroh kine ki post la pynlong ha kajuh ka tarik, bad kumta kane ka la pynbud lad na ka bynta jong ki wat hadien ba ki la dep ban siew ia ka bai eksam.

“Na ka liang ka seng ka kyntu jur ban weng mardor ia kine ki jingeh kiba ki trai shnong riewlum ki iakynduh namar ka jingbym ioh lad ban thoh ia ki eksam ha la ka jong ka jylla, bad ba ki dei ban ioh ia kane ka lad ha ki sngi ki por ki ban dang wan bad ruh ba kum kine ki jingeh kim dei shuh ban dang wan jia,” ong u samla Thabah.

Shuh shuh u la ong ruh ba ka KSU hi ka sngew mynjur bad ka NEIGRIHMS ka dei ban pynlong hi ia ki eksam jong ka ha ka jaka ban aiti sha kiwei pat ki kompeni namar ka don beit ka jingbym bit bym biang, bad kine ki mat ba la kdew haneng ki dei kiba ju jia khah khah ha kaba iadei bad ki kompeni na kiwei pat ki jylla namar kin ym sngewthuh ia ka jingsngew bad ia ka jingiohi da ki trai shnong jong kane ka jylla.

Ka seng KSU ka dawa ruh ba dei ban plielad shwa ia ki trai shnong riewlum ka jylla Meghalaya na ka bynta kino kino ki post lada ki nongaplai ki dei kiba biang na ka bynta ban shimti ia ka kam.