Dawa ka Meghalaya ban kyntiew ia ka bhah khajna sha ka 50% na ka 16th Finance Commission

Syllad | The Rising MeghalayaSeptember 30, 2024

Ka Meghalaya ka dei ka Jylla kaba phra kaba la dawa ban pynkiew ia ka bhah khajna sha ka Jylla na ka khajna ka Sorkar Pdeng ban sam sha ki jylla ne divisible pool sha ka 50%.

Ka Sorkar Jylla hapoh ka jingialam jong u Myntri Rangbah u Conrad K Sangma ka la phah ruh ia ka jingtyrwa kaba kot T.1.2 lak klur ka grants in aid na ka bynta san snem ha ka jingialang ba la pyniaid da u Chairman ka 16th Finance Commission u Arvind Panagariya ha ka jingialang kaba la long haka 30 tarik Nailur ha Shillong.

Haba kren sha ki lad pathai khubor, u Panagariya u la ong, “…Ka jingangnud jong ka Jylla ka long ban kyntiew ia ka bhah na ka divisible pool na ka 41% kaba mynta sha ka 50%. Mynta kane ka dei ka jingkhein kaba ngi la iohsngew na kawei ka jylla sha kawei pat bad kaba paw ba ha kylleng ki jylla ka la don ka jingangnud lem ba ka jingsam ia ka khajna ka dei ban kiew na ka 41% sha ka 50%.

Haba kylli la ka jingdawa jong ki jylla ka dei ne em kaba lah ban pynurlong, u Chairman u la ong, “Kane ka dei ka jingkylli kaba biang eh. Kane ka dei ka Jylla kaba phra bad ngi la iohsngew lah phra sien ban pynkiew na ka 41% sha ka 50 % na ka bhah khajna ka Sorkar Pdeng ban sam sha ki Jylla. Ha ka jingshisha ka Commission ha ki snem kiba la leit noh kam pat ju shim ia kane ka sienjam jong ka jingpynkiew kaba heh kum na ka 41% sha ka 50% kaba dei kaba la heh bha.”

Na ka liang u Chairman ruh u la pyntip ba ka Sorkar Meghalaya ka la phah ruh ia ka jingtyrwa ia ka jingpynioh kaba palat T.1.2 lakh klur ka grant in aid na ka bynta ki san snem ban wan.

“Ka grants in aid ka dei kaba wan na baroh ki jingioh lum khajna (consolidated fund) jong ka Sorkar Pdeng. Kine ki long kiba kyllain bha namar ia mynta hadien jong ka 14th Finance Commission, ka jingsam ia ka khajna ka Sorkar Pdeng ka long kaba la heh bha. Kumta ka Sorkar Pdeng ka la pyndonkam ia la ka jong ka bor la kan ai na la ka jong ka consolidated fund ne kan ai beit katkum ka jingai jingmut jong ka Finance Commission,” u la ong.

Kham hashwa u Chairman u la pyntip ba ka Commission ka la sngewhun bha ia ka jingpynshai jong u Myntri Rangbah ka Jylla u Conrad K Sangma ha ka por ba u la ai ia ka jingkren.

 “Ka Jylla ka la ai ia ka jingbatai kaba shai bha,” u la ong da kaba bynrap,“U Myntri Rangbah jong phi u la pyni ia ka jingangnud bad ka jingshimkhia ka jong u ha kaba iadei bad ka roi ka par jong ka Jylla bad ngi la sngewhun ia kaei kaba ngi la sakhi. Ka jingbatai hi ka dei kaba pynhun. Ka la kynthup ia ki prokram bapher bapher kaba iadei bad ka jingdon jong ki nongshong shnong, ka jinglong jong ki jaka bad ki kam jngohkai.”

Nalor kata u la kdew ruh ba ka jingpyni shaphang kumno ba ka jylla ka la lah ban tehlakam sted bha halor ka jingiap jong ki longkmie armet ha ka por kha khunlung ka long kaba sngewtynnad shibun.

Ha kaba iadei bad ka jingbatai ia ka Mission 10 jong ka Jylla, u Chairman u la ong, “Kawei pat ka bynta jong ka jingbatai ka long halor ka jingiamir jingmut ia ka Mission 10 kaba ka Jylla ka don ia ka plan kaba kynthup ia ki prokram kaba ka kwah ban pyntreikam bad ka jingkut jingmut jong ka na ka bynta ki paidbah ka Meghalaya, kata nalor ka jingbuh thong jong ka Jylla ban kynjoh sha ka thong ban kynjoh ia ka thong jong ka GSP sha ka 10 billion dollar kat haduh u snem 2028, kata ka ban wanrah ia ka per capita income kaba jan kot sha ka 3000 dollar, kaba long kaba biang palat.”

Ha kajuh ka por u Panagariya u la ong ba ka Commission mynta ka dang don hapdeng ka jingiakren bad ki Jylla lem bad ki kynhun bapher bapher, hynrei ia mynta hi ka jingiakren kaba kongsan jong ka Commission ka long bad ki Jylla.

“Ka Meghalaya ka dei ka jylla kaba phra kaba ngi la leit jngoh. Ngi la wan jngoh sha ki 7 tylli kiwei pat. Dang shen ngi la wan sha Assam bad ki jylla ba marjan. Ngi la pyndep kumba shi pawa na baroh ki 28 tylli ki Jylla, kumta ka dei ka bynta kaba dang kloi eh,” u la bynrap.