Dawa ka MLA Sutnga Saipung na ka NHAI ban pyndep noh ka jingmaramot ia ka surok NH-6 shwa ka por slap

Syllad | The Rising MeghalayaMarch 29, 2025

Ka nongthaw ain ka NPP na Sutnga-Saipung ka Kong Santa Mary Shylla ka la dawa na ka NHAI ba ka dei ban pyndep noh mardor ia ka jingmaramot ia ka surok bah National Highway-6 hashwa ban wan ka aiom slap.

Ia kane ka la pynpaw hadien ka jingleit jurip ia ka jingpyntrei ia kane ka surok ha ka 27 tarik Lber ha ryngkat u Deputy Commissioner, East Jaintia Hills District u Shivansh Awasthi, u Superintendent of Policeka District u Giri Prasad, u Project Director ka NHAI, ki kontraktor lem bad kiwei pat ki heh ophisar.

Ka MLA ka la pynpaw ka jingsngewkhia halor ka jingiaid suki jong ka kam khamtam shakhmat jong ka Sonapur ter ter da kaba ong, “Nga la jurip ia baroh ka shilynter jong ka surok bah NH6 naduh Khliehriat sha Malidor mynta ka sngi ha ryngkat ki heh jong ka NHAI bad ki bor district, bad nga sngewkhia jur ban iohi ia ka jingiaid suki jong ka kam.”

Ka la ong ruh ba ka sngewkhia jur na ka bynta ki nongshong shnong ka thaiñ, ki nongleit nongwan kiba hap ban mad ia ka jingeh namar ka jingthut ha ka leit ka wan, ka jingjur u pum pum khyndew bad ka jingsniew ka surok. Ngan shim ia kane ka kam kum kaba hakhmat eh bad ki bor ba halor bad ngi la bthah ia ka NHAI ba kan pynthikna ba ka dei ban pyndep noh ia kane ka jingmaramot ha ka jingwan jong u slap.”

Ha kane ka jingleit jurip u Deputy Commissioner ka EJH u la pyntip ba ki bor district ki la bteng ban iatreilang bad ka NHAI ha kaba ïadei bad ka jingïaid shakhmat jong ka kam ha kaba la pyntreikam ruh da ka No Entry na ka bynta ki kali heh naduh ka por 9 baje mynstep haduh 5 baje janmiet hadien ka jingkyrpad na ka NHAI khnang ba yn lah ban pynkloi ia ka kam.

U la ong ba watla katta ka jingiaid jong ka kam shakhmat jong ka Sonapur ha Kuliang, Umkiang bad Ratacherra ka long kaba suki. Halor kane la kyntu ia ka NHAI ba kan shim ia ki sienjam kynthup ka jingpynbun ia ki nongtrei bad ki mashin khnang ban lah ban pynkloi ia ka  jingpyntrei.

Na ka liang u Superintendent of Police ka EJH ruh u la kdew halor ki katto katne ki jaka ha kaba ki la don ki jingsniew jong ki kali kiba lam sha ka jingdheng kali kaba jur, bad u la kyntu ruh ia ka NHAI ban shimkhia mardor ha kaba iadei bad kiba kum kine ki jaka bad ban pyndep noh ia ka jingmaramot hapoh kine ki ar taiew ki ban wan.

Napdeng kiwei pat kiba la ia don lang ha kane ka jingleit jurip ki kynthup ruh ia u Rangbah Shnong ka Umkiang bad ki nongshong shnong kiba la kyrpad jur ia ka NHAI ban pynkloi ia ka kam bad kyntu ruh ia ki bor district ba kin pynthikna ban bteng ban khmih bniah ha kaba iadei bad kane ka kam.