Dawa ka MPUF ban pynbiang bor Pulit ha Ratacherra ban iaid beit ka rukom test COVID-19

Syllad | The Rising MeghalayaMay 27, 2021

Ka Meghalaya People United Front (MPUF), East Jaintia Hills District Unit haka sngi Palei kala dawa na bor synshar district ban pynbiang bor pulit ban pahara ha Ratacherra entry point kaba dei ruh ka jaka ban test iaka jingpang khlam COVID-19 ia kiba wan na kiwei ki jylla.

Ka MPUF kaba la hiar sha Ratacherra haka jingialam u Kyrshan Blah president MPUF East Jaintia Hills Unit bad u Juny Phawa president San Shnong circle ban jurip ia ka jaka test COVID-19 kila lap ba kane ka jaka ka don shibun ki jingduna.

U Kyrshan Blah ula ong ba kane ka jaka test ka don shibun ki jingduna ha kaba ki nongtrei ha katei ka jaka kim don ka jaka sah kaba biang bad ka um ban sum ban sleh bad ki painkhana kiba biang.

Ula iathuh ruh namar ba duna ka bor pahara na ki Pulit bunsien ki nongniah kali ki leh bymsuidniew ia ki nongtest ha katei ka jaka. La ong ba ki don tang 2 ngut ki pulit bad ki nongniah kali kim khein snep ia kine ki pulit bad kam long ruh kaba shngain ia kui nongtrei ha katei ka jaka kumjuh iaki pulit.

Ka MPUF kala dawa na ka bor synshar district East Jaintia Hills bad ka sorkar ban pynbiang bor pahara hakatei ka jaka khnang kan long kaba shngaiñ iakitei ki nongtrei katei ka centre. Ka MPUF kala ong ruh ba shen kan ai da ka jingthoh sa u Myntri ka tnad ka Koit ka Khiah ban pynbiang iaki jingdonkam ha katei ka jaka test.