Dawa ka NEHUTA ban weng mardor ia u VC namar ki kam pyrshah jaidbynriew riewlum

Syllad | The Rising MeghalayaAugust 19, 2024

Ka Seng jong ki nonghikai NEHU ka North Eastern Hill University Teachers’ Association (NEHUTA) ka la dawa ban weng noh mardor ia u Vice Chancellor (VC) ba mynta jong ka Skulbah u Prof PS Shukhla namar ki kam pyrshah ia ki jaidbynriew riewlum.

Ha ka shithi sha u dkhot, National Commission for Scheduled Tribes u Nirupam Chakma, u president ka NEHUTA u Prof Lakhon Kma u la ong, “Katkum ka phang, ngi la shim ia ka rai ban thoh shaphi kum u dkhot uba don ka jingkitkhlieh jong ka National Commission for Scheduled tribes (NCST) khnang ba yn lah ban ai jingsneng ia u VC namar ka jingpyndonkam bakla bad pyndik ia ki riewlum bad pynphriang ia ki kam pyrshah riewlum, bad ngi dawa ba dei ban weng noh ia u mardor na ka kam.”

“Ka jingktah lyngba kiba kum kine ki jingleh ba sniew bad ba rieh jong u Prof PS Shukla ki la wanrah ka jingsngewkhia bad ka jingkhihwin kaba jur hapdeng ki trai shnong riewlum ka Meghalaya kiba don haduh 86.15% na ki nongshong shnong lem bad ki trai shnong jong kiwei pat ki jylla ka thain shatei lammihngi (Northeast). Ha kiba bun na kiba kum kine ki khep jong ki kam banbein pyrshah ia ki riewlum kumba la kdew, u VC u la iai bteng ban pynkhein ia ka hok ban ioh ia ka jinglong mar ia ryngkat kumba la pynskhem hapoh ka Article 14, 15 bad 16 jong ka Riti Synshar jong ka Ri ha kine ki lai snem kiba la dep,” u la ong.

“Une u VC u dei u nongpynkhein ain ba khrawtam ha baroh ki rukom treikam jong kane ka skulbah bad ka NEHU Act, Statutes, Ordinances and Regulations bad UGC Regulation 2018 naduh ba u la wan shimti ia ka kam kum u VC ka NEHU ha u snem 2021. Um shym la lah ban pyniaid ha ka liang ka pule puthi bad ha ka ajor ban ialam ia ka skulbah. Kumta, ka jingbteng ka jong u ha ka kam kan shu nangpyntroin bad pynhiar arsut ia ka skulbah NEHU. Kumta ngi kyrpad jur ia phi ban shim ia ki sienjam ban weng ia u mardor na ka kam VC na ka bynta ka jingmyntoi bad ka jingbha jong ka NEHU bad ki riewlum ka Jylla Meghalaya bad ka thain Northeast,” bynrap u president ka NEHUTA.

U Prof Kma u la ong ruh namar ka jingduna ka jong u kum u VC, ka jingbym don ba khah khah ha ka jaka treikam na ki daw ki bym lah ban tip, ka jingbym don jingkitkhlieh bad ka jingsngewkhia na ka bynta kane ka skulbah bad ka jingpynpaw ia ka jingleh shiliang khmat bad ka jingnoh liang, u Prof PS Shukla u la ialam ia ka NEHU sha ki nala.

Haba pynpaw ba ka kyrdan jong ka  University ka la nanghiar arsut, u nongialam ka NEHUTA u la ong, “Haba u (Prof Shukla) u la wan shimti kum u VC ka NEHU ha u bnai Naitung 2021, ka kyrdan jong ka skulbah NEHU katkum ka National  Institutional Ranking Framework (NIRF) Ministry of Education, Government of India ka long ha ka kyrdan kaba 59, hynrei hadien ka la hiar sha ka kyrdan kaba 66 ha u snem 2022, sha ka 80 ha u snem 2023 bad kaba kham sniew shuh shuh ka long sha ka kyrdan kaba 136 ha une u snem 2024.