Dawa ka NESO na ka Sorkar Pdeng ba kam dei ban ai jaka rieh ia ki nong Bangladesh hapoh North East

Syllad | The Rising MeghalayaAugust 8, 2024

Ka North East Students’ Organization (NESO) ka la dawa na ka Sorkar Pdeng ba kan pynthikna ba ym dei ban aijingiada ne jaka rieh wat ia iwei ruh ki nong Bangladesh hapoh kane ka thain Shatei Lammihngi (Nroth East).

Ha ka shithi Myntri Rangbahduh ka Ri u Narendra Modi bad Myntri kam Pohiing u Amit Shah ha ka 7 tarik Nailar, u Chairman ka NESO u Bah Samuel B Jyrwa ula ong “Ka NESO ka kyrpad jur ia ka jingtuklar jong phi ban pynthikna ba ym dei ban don ka jingwan rung beain sha ki Jylla ka thain North East na Bangladesh bad kyrpad ruh ba ym dei satia ban ai jingiada ne jaka rieh ia iwei ruh na ki nong Bangladesh hapoh kane ka thain North East.

“Ha kaba kum kane ka por, ka long kaba donkam shibun ia ka Sorkar India ba kan pynthikna ba dei ban pyrkhing jur ia ki jaka khappud jong ka thain North East India bad ka Ri Bangladesh khnang ban lah ban khanglad ia ka jingwan rung bein jong ki briew na shiliang khappud,” u la ong.

Nalor kaya u Bah Samuel ula ong ba ki jingiakynad kaba la iasyriem kum ka thma kaba jia mynta hapoh Bangladesh ka lah ban ktah haduh katta katta ia ka ri India khamtam ha ka thain North East ha kaba saw tylli ki Jylla kiba don ia u pud u sam bad ka Bangladesh.

Ka Tripura ka iasam ia u pud ba 856 kilomitar bad ka Bangladesh, ka Meghalaya ka don 443 km u pud, ka Mizoram ka don 318 km bad ka Assam ka don 262 km u pud ba iasam bad ka Bangladesh.

“Kane ka jinglong jingman kaba mynta hapoh Bangladesh ka lah ban lam sha ka jingphet wir jong ki nongshong shnong jong ka shapoh kane ka ri ka jong ngi khamtam sha kane ka thain North East” ula ong haba bynrap ba ki jingjia kiba la leit ki pyni ba haba don kano kano ka thma pohiing ne ka jingiakhih paidbah ha Bangladesh, ka thain North East ka hap ban mad ia ka jingtynjuh jong ka jingwan rung beain ki briew na katei ka ri ba marjan.

Ha ka por ka jingphiah ia ka Ri ha u snem 1947, da ki lak ki Bengali na East Pakistan kila jam sha shiliang u pud bad dakhol jubor ia ki jaka ha Assam bad Tripura (kiba dei ki Union Territory ha katei ka por).

Kumjuh ruh ha ka thma laitluid ka Bangladesh ha u snem 1971, hangne ruh da ki lak ki briew na East Pakistan kila wan phet shapoh India kynthup ha ka thain North East kaba wanrah pat ia ka jingkylla ha ka jingdon paid ki trai shnong kum ha Jylla Assam, Tripura bad Meghalaya (kiba dei mynshuwa jong ka jylla Assam).

“Kane ka jingwan tuid jong kine ki nongwan buhai shnong beain na Bangladesh (East Pakistan) ki la wanrah ia ka lyer jong ka jingklumar bad ka jingialeh kaba jur bha ha ka thain North East,” ong u Bah Jyrwa.