Dawa ka NPP Women’s Wing na u MLA ban pynurlong ïaki kular elekshon

Syllad | The Rising MeghalayaSeptember 17, 2019

JOWAI: Ka National People’s Party Women’s Wing, West Jaiñtia Hills District bad ka Women’s Wing Jowai Block Unit kila dawa na u MLA ka Jowai u Ma Wailadmiki Shylla ban pynurlong ïaki juban lak ba ula khlei haka por elekshon.

Ka National People’s Party Women’s Wing, West Jaiñtia Hills District bad ka Women’s Wing Jowai Block Unit haka dorkhat kaba kila aiti sha u MLA  ka Jowai haka 16 tarik une u bnai kiba buh ki jingdawa kiba bun hakhmat u MLA. Ïa kane ka dorkhat kila ha ïing ka kong Phidalia Toi, Political Adviser NPP State President, Dr. W. Kharlukhi.

Ka NPP Women’s Wing kala pynpaw ïa kiba bun ki mat jingdawa na ka bynta ka bha ka miat ka Jowai, ka District bad ka Jylla.

Haka dorkhat ka NPP Women’s Wing kila dawa ban pyndep ïaka jingtei thymmai ïaka Iawmusiang, ban pyndep ïaka projek umbam umdih ka Umngot Water Supply Scheme bad ka Maternity Hospital ha Jowai.

La kyntu ïa u MLA ban shimkhia ban ïakren bad ka sorkar jylla halor ka ki nongtrei Work Charge ha ki tnad sorkar bapher bapher ba kin lait ban shah beh kam, khamtam ïa kiba la trei san snem shaneng bad ïa kito kiba la kut ka rta ban apply kam sorkar.

Kiwei kiwei ki mat jingdawa ki kynthup ïaka jingpynjlan ïaka rta thep kam sorkar, ban pynjynsur ïaka jingpyrkhing ban tei jingtei harud ka Wah Myndtu hapoh 500 meter namar ba ka ktah ïaki trai khyndew kiba don ki jaka kiba rit.

Ban biat ban biang baroh lang ki nongshong shnong bad ban ïada ïaka Wah Myntdu bad ki wah duid ba tuid sha ka Myntdu la kyntu ban shna ïaki jaka pynlang um bad ki bad ban shna ruh ïaki nur bah kiba khang iaka jingtuid ki jakhlia sha ka wah.

Ka NPP Women’s Wing kala pynpaw ba kala donkam kyrkieh ban pynbiang ïaki jaka bret ñiut kiba paka na ka bynta ka sork Jowai bad la dei ban shna ïaki Waste Treatment Plant shabar ka shnong Jowai kum ka Sabahmuswang kaba kum kine ki jaka pynlang ñiut kin lah ruh ban weng ïaka jingkyrduh kam kyrduh jam ki samla.

La kyntu ïa u MLA ban shimkhia ban shimkhia halor ka jingma jong u drok kaba la kynrei bha ki samla kiba ngop bad kyrni haka jingdih drok bad ban ïada ïaki na ka jingpang HIV/AIDS bad ban kyntiew ïaka kam ïalehkai ban lait ki khynnah bad samla na ki jingmlien ba sniew.

Ha kane ka jingai dorkhat ki NPP Women’s Wing la ïadonlang ki MDC jong ka JHADC.