Dawa ka Seng HYC ban pyntreikam noh mardor ia ka Ayurvedic Centre ha Shella-Bholaganj C&RD Block

Syllad | The Rising MeghalayaFebruary 25, 2024

Ka Seng Hynniewtrep Youths’ Council (HYC) Jatap Unit ka la dawa na ka sorkar ba ka dei ban pyntreikam noh mardor ia ka Ayurvedic Centre ha Shella-Bholaganj C&RD Block khnang ba kan long ka jingmyntoi kaba khraw ia ki paidbah nongshong shnong jong ka thain hi baroh kawei.

Ka Seng ha ka dorkhas ba la phah sha u Director of Health Services (MI) ka Sorkar Jylla ka la pynpaw da kaba ong, “Katkum ki kot ki sla kiba ki la ioh na kane ka ophis jong phi ngi la lap ba ka Sorkar Jylla lyngba ka Health Department ka la pyntip sha ka  ophis jong phi ha ka 4-2-2009 ba ka la ai jingbit ban tei ia ka Ayurvedic Centre hapoh ka C&RD Block ka jong ngi ha ka jinglut kabs long T.84,96,000/- (Phra Phew Saw Lak Khyndai Phew Hynriew Hajar). Ia kane ka Centre la shna hapoh Saikarap, Elaka Mustoh, Shella Confederacy.”

Ka Seng ka la ong ruh ba ka ophis jong u Executive Engineer, Health Engineering Wing, DHS, Meghalaya, Shillong ha u snem 2010 ka la aiti ia ki Work Order sha ki Hynniew (7) Ngut ki Kontraktor na ka bynta ban tei ia iingsah jong ki nongtrei bad ki jaka ai dawai.

Nalor kata ka la ong ruh ba katkum ki kot ki sla la pyni ba ia ki kam ban tei ia ki iing kiba donkam la dep ban pyndep lut ha ka jinglut kaba long Tyngka 84,94,000/- (Phra Phew Saw Lak Khyndai Phew Saw Hajar).

Hynrei ka Seng hadien ba ka la pynlong ka jingleit jurip ia kitei ki jingtei ha ka 23 tarik mynta u bnai ka la shem ba ia kine ki jingtei la shu ieh khongreng khlem don mano mano ba peit bad kylla long pynban ki iingjah.

Kumta ka seng ka pynpaw ka jingsngew diaw halor ka jingbym shimkhia jong ki bor  ba dei peit na ka bynta ban lah ban plié noh ia katei ka jaka ai jingsumar kaba kum ki paidbah ki la ap khmih lynti ba kan long ka jingiarap bad jingkyrkhu ia ki nongshong shnong jong ka dong ka thain hi baroh kawei.

“Ngi sngew ruh ban pynpaw ba kane ka jingieh bad pynkylla iingjah ia kine ki jingtei wat hadien ba la dep shna ka long ruh ka jingpynsyrwa kai ia ka pisa u paidbah khelm don kano kano ka jingmyntoi,” pynpaw shuh shuh ka Seng.

Kumta na ka liang ka Seng ha u kyrwoh lyngba u Pyndapbor Shongwan President bad u Pyndaplang Laitmon Genl Secretary ka dawa ia ka sorkar lyngba une u heh ba dei khmih ban shim ia ki sienjam ban plie noh kloi ia kane ka jaka aijingsumar na ka bynta ka jingbit jingbiang jong ki paidbah nongshong shnong jong ka thain.