Dawa ka JSU ban buh ia ka MPSC Examination Centre ha Rilum Jaintia

Syllad | The Rising MeghalayaApril 2, 2025

Ka Jaintia Students’ Union (JSU) ha ka 2 tarik Iaiong ka la dawa na ka sorkar Jylla ba kan buh noh ia ka Meghalaya Public Services Commission (MPSC) Examination Centre ha Rilum Jaintia.

Haba aiti ia ka dorkhas sha u Symbud Myntri Rangbah u Bah Sniawbhalang Dhar, u General Secretary ka JSU u Neilkee Mukhim u la ong, “Ngi kyntu jur ia ka sorkar bad ia ka MPSC ba kin buh noh ia ka MPSC Examination Centre ha Rilum Jaintia khlem da pynslem shuh. Ka jingbuh ia kane ka Centre kan weng ia ki jingeh kaba ki samla pule ki hap ban mad khamtam kito kiba wan na ki longiing kiba duna ha ka ioh ka kot bad ban pynthikna ia kajuh ka lad na ka bynta ban ioh iakhun ia ki eksam.”

U la ong ba ka jingbym don ia ka MPSC Eksam Centre ha Rilum Jaintia ka la wanrah ka jingeh kaba khraw ia ki samla pule na ka thain ka jong ngi.

“Ki samla pule na ki thain kiba pajih jong ka East Jaintia Hills bad West Jaintia Hills District ki hap ban leit shaduh sha Shillong ban iakhun ia ki eksam MPSC kaba ktah jur ia ka por bad ka jinglut jingsep. Ka jingjur jong ka jingdheng kali khamtam ha ki por longskul, longtrei ki lam sha ka jingslem bad kaba khanglad ia ki samla pule ba kin poi sha ki jaka thoh eksam ha ka por kaba biang. Kito kiba wan poi slem ki la shah khanglad ban rung kaba lam sha ka jingduh ei ia ka lad ka kabu,” u la ong.

Une u nongialam ka seng u la ong ruh ba bun ki samla pule na ka thain Rilum Jaintia ki dei kiba wan na ki longiing kiba duna ha ka ioh ka kot. Ka jinglut jingsep ha ka leit ka wan sha Shillong kynthup ia ka jinglut jingsep ha kaba iadei bad ka bam ka dih, ka jaka sah ka ktah jur ia kine ki samla. Ka jingsyier na ka jinglah ban duh thoh ia ka eksam namar ka jingslem ka la nangban khia shuh shuh ia ka jingeh.

Nalor kata u la ong ba watla ki don shibun ki samla kiba aplai kam napoh Rilum Jaintia, hynrei ka jingbym don ia ka centre thoh eksam ka la pynduh noh shibun haba ia nujor bad kiwei pat ki samla pule kiba dei na kiwei ki district kiba lah ban poi da kaba suk sha ki jaka thoh eksam.

Khlem ka jingtip ka bor shnong Wapungskur, ioh jingbit ban pynieng karkhana sain rnga dewiong

Ha kajuh ka por une u nongialam ka seng u la pyntip ba na ka liang ka JSU ka la rah barabor ia kane ka kam bad u Myntri ka Tnad pule puthi lem bad kiwei pat ki bor ba dei khmih. Hynrei, wat hapdeng ka jingpyrshang ka jong ngi, ym pat shym la lah ban shim ia ki sienjam na ka bynta ban buh ia ka examination centre hapoh kane ka district.

“Watla ka MPSC Cell ophis ka don ha Jowai, hynrei ka jingshakri ka long kaba duna shibun namar ka jingbym don ia ki examination centre. Ki samla pule ki hap ban leit shaduh sha Shillong ban pyndep ia ki kam namar ka jingbym lah treikam bha jong kane ka ophis kumba ka dei ban long,” u la ong.

Ha kajuh ka por u la ong ba naduh ba la thaw ia ka jylla Meghalaya ha u snem 1972, ki nongshong shnong ka Rilum Jaintia ki la hap ban mad ia kiba bun ki jingeh ha kaba iadei bad ka jingioh lad ha ka liang ka pule puthi bad ka ioh kam ioh jam.