Dawa ka Seng ki nongtrei trai jylla bad KSU Narpuh ban weng mardor ia ki bar jylla ba kynshoit ia ki pulit

Syllad | The Rising MeghalayaAugust 25, 2023

Ka Seng jong ki nongtrei trai jylla hapoh ka karkhana dewbilat TOPCEM, kata ka Topcem Employees Association ha ryngkat ka Khasi Students’ Union (KSU) Narpuh ki la dawa na kane ka kompeni ba ka dei ban weng noh mardor hapoh ka 24 kynta ia ki nongtrei bar jylla kiba kynshoit bad pynshit ia ki bor pulit ha ka jingpynlong ia ka jingpynsngew paidbah ne public hearing kaba la long hynnin ka sngi Palei ha Thangskai, East Jaintia Hills District, kata kumba la sakhi lyngba ki social media.

Na ka liang ka TEA ha u kyrwoh lyngba u Bah D Malang president bad u Bah A Passah Assistant Seretary ki la phah da ka jingthoh sha u Sr President ka Meghalaya Cements Ltd, Thangskai ki la pynrem jur ia katei ka jingleh jong kitei ki nongtrei bar jylla ia kiba la tip kyrteng kum u Arun Kejriwal (AVP) bad u Umesh Kumar uba dei u GM Mines bad dawa ruh ban weng kam noh ia ki mardor namar ka jingdonkti ha kaba kynshoit bad pynshit ia ki bor pulit ban bom naphang ia ki paidbah hadien ba ka la mih ka jingiakynad hapdeng ki pulit bad ki paidbah ha ka por ba pynlong ia ka public hearing hynnin ka sngi 24 tarik Nailar 2023.

Na ka liang ka KSU ruh ka la ai ban leit ai da ka jingujor sha ki bor pulit na ka bynta ban kem noh mardor ia kine ki arngut ki bar jylla kiba donkti ha kane ka kam kynshoit bad pynshit ia bor pulit kiba dang don ha la ka jong ka kam.