Dawa ka Sur Paidbah East Jaintia Hills na u Kyrmen Shylla ban plie noh iaka Civil Hospital Khliehriat

Syllad | The Rising MeghalayaJanuary 12, 2022

Ka Sur U Paidbah East Jaintia Hills District kala dawa na u Myntri Sorkar Ma Kyrmen Shylla ban plie paidbah noh iaka Khliehriat Civil Hospital haka sngi Balang.

“Ngi la ioh jingtip ba ka sorkar kala dep mynjur ban kyntiew kyrdan iaka Khliehriat CHC sha ka Civil Hospital,” la ong ka Sur U Paidbah East Jaintia Hills haba ai iaka dorkhat sha u Myntri uba long ruh u MLA ka Khliehriat.

Ka Sur U Paidbah East Jaintia Hills kala ai da ka dorkhat ha u ma Kyrmen Shylla ban iathuh ia u baka sorkar kala dep ban kyntiew kyrdan iaka Khliehriat CHC sha ka Civil Hospital, pynban ka jingplie paidbah ia kane ka hospital ka dang sahteng haduh mynta.

“Ngi la donkam kyrkieh ban plie paidbah noh iaka Khliehriat CHC sha ka Civil Hospital khnang ba kan long kata ka hospital kaba pura kaba biang lut ki dawai dashin bad ki tiar ki tar naka bynta ban myntoi u paidbah ka thain East Jaintia Hills District,” la ong ka Sur U Paidbah East Jaintia hills haka dorkhat.

Ia kane ka dorkhat la aiti ha u MLA ka Khliehriat da u Chairman Dr. R Phawa haka jingiadonlang u Assistant General Secretary Streamly Suchen, Finance Secretary  Voilet Lyngdoh bad kiwei kiwei.

“Ka jingdawa ban ioh iaka Civil Hospital kaba pura ka dei ka jingangnud u pauidbah ba bun balang bad ka Khliehriat Civil hospital kan pynjem ruh iaka jingeh ki hospital ha ki jaka sor namar ba ki paidbah kim hap ban iabeh sha kiwei ki jaka sumar bad kan iada ruh naka jingduh iaki mynsiem ba kordor,” la ong ka dorkhat

Shuh shuh ka synjuk kala dawa ban shimkhia ban iakren bad sorkar halor ka Civil Hospital Khliehriat bad nakaliang u ma Kyrmen ruh ula kular ban shimkhia ia kane ka kam.