Dawa ka synjuk AJCVA ban pynshitom shirta jingim kiba donkti ban pyniap iaki nongniah kali kamai ha Rilum Jaintia

Syllad | The Rising MeghalayaAugust 27, 2022

Ka All Jaintia Commercial Vehicle Association (AJCVA) kala dawa na ka bor jong ka aiñ ban pynshitom da kaba shet byndi shirta jingim iaki suba donkti ban pyniap iaki ar ngut ki nongniah kali kamai ha rilum Jaintia Hills

Kine ki ar ngut kiba shah pyniap ki dei u Damehipaia Papeng uba kamai kali Jowai sha Ladrymbai uba la jah naduh u bnai Nailar 10 tarik bad u Fullmoon Kharsahnoh ba kamai Jowai Shillong uba la lap iaka metiap ia u ka juh ka sngi na Mynkre East Jaintia Hills.

Halor kane ka jingshah pyniap kine ki ar ngut ki nongniah kali, ki pulit kila kem iaki saw ngut ki suba donkti kiba kynthup ia u I Love You Talang, Ramesh Dkhar, Tellme uba tip kum u Bor Pyrtuh bad u Sampher Ksoo.

Na kaliang ki synjuk niah kali ka AJCVA bad Hynniewtrep Women Welfare & Development Organization (HWDO) kila pynrem jur halor kane ka jingjia kine ki runar thrangsnam ban shim iaka jingim kine ki arngut tang na ka bynta ka kali jong ki.

Ka AJCVA ka kyrpad ia ki bor ba dei peit ban pynshitom ia kine ki riew khlaw nong pyniap briew da ka ba set phatok ia ki shi jingim.

Ka la pynbna ruh ban kan don ka ialang paidbah (Kaba iaka tarik ym pat pynbna) ban pynrem iakane ka jingjia bad ban dawa na ka bor jong ka aiñ ban pynsaja shirta jingim ia kine ki runar.

La ong ba ki synjuk niah kali na kylleng kin wan ban iashimbynta na Rilum Jaintia bad Khasi Hills kiba la kynjoh palat 45 tylli ki synjuk niah kali tang na East Jaintia Hills bad West Jaintia Hills . Ka HWDO ka ai ka jingkyrshan ka pura ia kane ka jingjia jingialang paidbah ban pynrem ia kitei runar thrangsnam.