Dawa ka Synjuk Dorbar Shnong ka Pamrapaithlu PHC ban pynkiew kyrdan ia ka PHC sha ka CHC

Syllad | The Rising MeghalayaAugust 15, 2023

Ka Synjuk Dorbar Shnong jong ka Pamrapaithlu PHC ba kynthup ia ki 21tylli ki Shnong ba hap ha ka Pamrapaithlu PHC mynta ka sngi ka 15tarik -08-2023 ki la iohlad ban pynsngew bad ai da ka jingthoh ia ka Dr. M Ampareen Lyngdoh, Minister Incharge Health and Family Welfare Govt. of Meghalaya ha ka jingwan peit jong ka ia kane ka PHC ba dang don shibun ki jingduna ba dang donkam ban pynbiang Khnang ba kan lah ban shakri khambha shi ki ba pang ba shitom ki ba duk ba kyrduh.

Ha ka jingthoh ba la aiti la pynsngew ia shibun ki mat jingdawa kawei na kita ba kham hakhmat eh ka dei ban pynkiew kyrdan noh ia kane ka PHC sha ka CHC namar ba ka Population ka la poi sha ka 40,000 ngut ki jingbunbriew ia kaba kane ka PHC ka ju ioh ia 50 ngut ki Nongpang OPD bad ia 20ngut ki Longkmie ba wan kha khun ha man la ka shibnai ka ba la buh jingeh shikatdei na kadaw ba ymdon ia ki Kamra ba biang ba kylluid.

Ka jingdon tang iwei I Doctor Medical & Health Officer ha kane ka PHC ka la buh jingeh shikatdei ban peit ban sumar ia ki ba pang ba shitom, Kumta la dawa ban pynioh sa iwei I Medical & Health Officer khnang ban ai jingsakhri bad jingsumar ba khambha ia ki paidbah jong ka thain.

Kiwei de ki jingdawa ka dei halor ban pynioh Ambulance da ka bathymmai ban don ia ka kor X-ray Machine, Ultrasound Machine, ban pynbun ki Medical Staff(Kynthei bad Shynrang) bad ki Nurses ha kane ka PHC,

La dawa ruh ban pynbiang ia ka building & infrastructure ka ba donkam bha ban don kawei ka waiting room, Emergency Room, Labour Room, Storage Room bad ki tier equipment ka Delivery Kits ( HIV/Non-HIV) bad ka Assist Vacuum Delivery.

Na ka Liang ka Dr. Ampareen Lyngdoh ka la pynsngew ba ka kloi ban shimkhia ia kine kiei kiei baroh ki jingdonkam jingduna ban pynbiang ha kane ka PHC ha ki Sngi ban sa wan bad kan sa bishar bniah ha kaba iadei ban pynkiew kyrdan sha ka CHC.

Lah ban kdew ba hapoh ka East Jaintia Hills District ka don tang sa kawei ka CHC kata ka Sutnga CHC hadien ba la pynkiew kyrdan ia ka Khliehriat CHC sha ka Civil Hospital, te la I donkam shisha ban pynkiew kyrdan ia Pamrapaithlu PHC sha ka CHC.

Ha kane ka jingwan iuhkjat jong ka ha kane ka PHC la synranlang da MDC Musniang Rangad u Phasmon Dkhar, EM JHADC, U District Health &Medical Officer, EJHD Dr. D Shylla, ADC EJHD Shri. G Warjri, ha ryngkat ka jingiadonlang ka Dr. R Suchiang M&HO, ki Staffs jong kane ka PHC, Ki Waheh Shnong bad ki Secretary Shnong jong ki Shnong ba hap ha kane ka PHC lem bad kiwei kiwei de.