Dawa ka TUR na ka Sorkar Jylla ban khang ia ka jingthmu iaid paidbah ka seng Hindu

Syllad | The Rising MeghalayaSeptember 13, 2024

Ka Thma U Rangli (TUR) ka pynrem jur ia ka kynhun ka seng shit niam Hindu kaba la kam ba la ialam da uta u riewkhuid Jagatguru Shankaracharya Swami Avinmukteshwarananda Saraswati kaba la iaid kylleng ka Ri India ban iawer paidbah sha ka jingialang bad jingiaid paidbah ban pyrshah ia ka jingot doh Masi ia kaba yn pynlong ruh ha Shillong ha ka 2 Risaw 2024.

“Ka jingthmu jong kane ka rally ki kynhun shitniam Hindu ka long ban dawa ban khang noh ia ka jingot doh masi ha baroh kawei ka Ri India. Kane ka jingkhot bad jingdawa ban khang ban ot doh masi ha ka Ri India ka dei ka mat ba ka kynhun shit niam ba heh paid jong ka niam Hindu ka thmu ban pynbor ia kiwei pat ki jaitbynriew bapher bapher kiba im ha Ri India ba kin bam bad ban ngeit kumba ngeit ma ki. Hynrei  kane ka long pyrshah ia ka Riti Synshar ka Ri bad ka wanrah ka jingpyniapher niam bad ka dei ruh ka jingleh donbor jong ki shitniam heh paid Hindu kiba thmu ban synshar donbor ia ka Ri India bad kiba thmu ban phrung jubor ha ka synshar khadar bad imlang sahlang da ka jingthmu ban pyntreikam tang kawei ka ktien, kawei ka niam bad kawei ka kolshor,” ong u kyrwoh ka TUR.

“Ka pyrthei India ka dei ban tip ba ki nongshong shnong ka Jylla Meghalaya ki dei kiba bam doh, naduh ka doh sniang, ka doh masi bad kiwei ki jait doh. Ki don ruh ki shnong hapoh ka Jylla Meghalaya ha kaba ki trai ri ki pyndonkam ne pyniap da ki sniang, ki masi ha ka phur ka siang ne ka knia ka khriam. Kumta ka jingthmu ban pynlong ia ka jingiaid paidbah ban khang ot doh masi bad ban pynieng ia kata ka lama ban iada ne mane ia ka masi ha Nongbah Shillong kam dei ka hok ban mane blei laitluid hynrei ka dei ka jingpynibor bad ka jingsdang jong ka jingsynshar donbor ki kynhun shit niam ka niam heh paid Hindu,” ka la ong.

Pynkhreh ka seng Hindu ban wan pynbna ia ka masi kum ka kmie ka Ri ha Shillong

Kumta ka TUR ka pynrem jur ia kane ka jingthmu bad ka jingwan jong kane ka kynhun shit niam Hindu kaba wanrah ia ka jingkulmar. Ka TUR ka dawa ruh na ka Sorkar bad bor District ba kim dei ban ai jingbit bad ba ka Sorkar Meghalaya ka dei ban khang shisyndon ia ka jingtreikam jong kane ka seng ha ka Jylla.

Ha kajuh ka por ka TUR ka maham ruh ba lada ka Sorkar ne bor District kim khang ia kane ka jingialang paidbah kaba la khot da kane ka kynhun shit niam Hindu ha ka 2 tarik Riaw ban wan na ka liang ka TUR ruh ka khot ia baroh ki nongshong shnong kiba ngeit ha ka Riti Synshar bad kiba ieid ia ka jingsuk bad jingshong suk ban ialum ha kajuh ka jaka ba pynlong ia kata ka rally khang doh masi. Bad na ka liang ki paidbah nongshong shnong ka Shillong pat kin pynlong da ia ka jingia bam don masi bad kiwei de ki jait jingbam tynrai jong ki trai ri trai muluk ka Jylla Meghalaya.

Shah kynnoh ka Shillong Press Club ha ka seng khang bam doh Masi bym ai jingbit pynlong jingialang