Dawa ka VPP ban weng mardor ia ka notice pyrshah ia ka principal ka Govt Girls HSS, Jowai ba shah ia ki khynnah ban tem ia ka jingrwai prah

Syllad | The Rising MeghalayaSeptember 12, 2023

Ka Voice of the People Party (VPP) haka sngi Nyngkong ka la dawa na u Director of School Education and Literacy ba u dei ban weng noh mardor ia ka show cause notice pyrshah ia ka principal jong ka Government Girls’ Higher Secondary School, Jowai namar ka jingailad ia ki khynnah pule ba kin tem ia ka jingrwai kaba dei jong kane ka party.

Ka VPP ha u kyrwoh lyngba u nongaiktien jong ka u Dr Batskhem Myrboh ka la ong ba ka party ka dawa ban weng mardor ia katei ka notice bad ruh ban pan map ym tang na ka Principal jong ka skul namar kane ka kam leh donbor hynrei na ki paidbah namar kane ka jingpyrshang ban khanglad ia ki hok jong ki nongshong shnong ba kin jied ha la ka jong ka mon.

Da kaba pynpaw ba kane ka jingphah ia kane ka show cause notice ka long ka bym don nongrim, u Dr Myrboh u la ong ba ia kane ka jingleh dei ban pynrem jur bad khamtam kaba pynklumar jingmut namar kane ka pyni iaki kam leh donbor jong ki bor synshar ha ka jylla Meghalaya.

U la ong ba kane ka kam pyni bor da u heh sorkar lehse ka lah ban long ba u la shim hi ia ka rai namar ka jingbym don jingtip ha kaba iadei bad ka Meghalaya Services (Conduct) Rules, 2019 lane ban pynsngewbha ia ka  party kaba synshar ia ka jylla, kata ia kaba tang ma u hi u tip kham bha.

Nalor kata u la ong ruh ba ha katei ka show cause notice une u ophisar ba donkti um shym la lah ban kdew halor kino kino ki rule ban pynpaw ba kane ka principal ka la pynkhein ia ki kyndon, bad ha ka jingshisha kim ju don ki kyndon ki ban pynkitkhlieh ia ki nongtrei sorkar halor ka jingleh jong ki khynnah pule ki bym shym la shah kynthup ha katei ka Rules jong ka snem 2019.

Shuh shuh u Dr Myrboh u la ong  u la kdew ruh ba kawei pat ka lah ban long ba une u ophis ba la phah ia kane ka notice lyngba ka hukum da ki bor synshar ba halor lane da ki riewsain hima kiba don hapdeng ka jingsyier.

“Kam long ruh kaba artatien ba ki don ki kynhun kiba sheptieng ia ka jingphai khmat jong u paidbah kynthup naduh ki khynnah ha ka jylla halor ka jingkhot jong ka seng VPP na ka bynta ka clean politics ne ka kam sain hima sima kaba khuid ba suba. Kiba kum kine ki kynhun ki don ia ka jingangnud ban shim ia ki lad ki lynti ban pyntieng pynsmiej ia ki paidbah khnang ba kin sangeh ban ialap bad pynphriang ia ka jingieit jong ki paidbah ia ka seng VPP,” ong shuh shuh utei u nongaiktien.