Dawa ka VPP ban ym pynshong nongrim ia ka jingpynrung klas ia ki samla pule lyngba ka CUET

Syllad | The Rising MeghalayaMay 17, 2024

Ka Voice of the People Party (VPP) ha ka 16 tarik Jymmang, ka la dawa na ka sorkar bad ka North Eastern Hill University (NEHU) ba kim dei ban pynshong nongrim lyngba ka Common University Entrance Test (CUET) na ka bynta ka jingioh rung klas jong ki samla pule.

“Halor kane ka bynta, ka VPP ka dawa ba ka NEHU bad ka sorkar Jylla kim dei ban pynshong nongrim lyngba ka CUET na ka bynta ka jingioh rung klas. Hynrei, pynban ki dei ban pynshong nongrim ia ka jingioh rung klas lyngba ka eksam Class XII,” ong u nongialam ka VPP uba dei u dkhot ka Media Cell u Dr Rusievan Shangpliang.

Nalor kata u la ong ruh ba ka kynrum kynram kaba mih ha ka jingpynlong ia ka eksam CUET hapoh NEHU ha ka ka pynpaw ia ka jingdkoh ha ka rukom pynkhreh ba ka jingshim sting jong ka National Testing Agency (NTA), ka sorkar Jylla bad ki bor pyniaid jong ka NEHU.

“Ka long da shisha ka jingjia kaba sngewsih shibun ba ki samla pule kin hap ban mad ia kiba kum kine ki jingeh tang namar ka jingbym don ki bor bad dei khmih ki ban peit na ka bynta ka bha ka miat ka jong ki,” u la bynrap.

U la bynrap ruh da kaba ong, “Ki samla pule ki la hap ban hap haduh 3 kynta na ka por ba la buh ban ioh thoh ia ka eksam jong ki. Kane ka rukom pyniaid kaba kynrum kynram ka la pynklumar jingmut shibun ia ki samla pule bad kaba lehse ka la ktah ruh ha kaba iadei bad ka jingleh jong ki ban lehbha ha ka eksam.”

Shuh shuh u Dr Shangpliang u pynkynmaw ruh ba ka seng VPP ka la dep ban maham teng ia ka sorkar Jylla halor kane ka kam, kata la ka long hapoh ne shabar jong ka iingdorbar thaw ain ka Jylla.

“Hynrei, ka long kaba sngew bynniaw ba na ka liang ka sorkar Jylla bad khamtam na ka liang u Myntri ka Tnat pule puthi ki la jied ia ka lynti ban ym pyrkhat khia na ka bynta ki samla pule hynrei ki la pyrshang pynban ban leh politik halor kane ka bynta,” u la bynrap.

Nalor kata u la ong ba na ka liang ki principal jong ki kolej kumba la sakhi ha ki lad pathai khubor kim shym la ioh pdiang ruh ia ki jingbthah kiba biang la ka long na ka liang ka sorkar Jylla lane na ka NEHU halor ka jingpyntreikam ia ka CUET na ka bynta ka jingioh rung klas.Kumta kine ki jingleh bym suitniew jong ki bor ba dei khmih ki la pynkylla langknia ia ki samla pule.