Dawa ka VPP na ka DC ban pynsangeh ia ka jingshim jaka shna surok ha ka shnong Mawshun

Syllad | The Rising MeghalayaJuly 23, 2024

Ka Seng Voice of the People Party (VPP) ha ka 22 tarik mynta u bnai ka la dawa ban pynsangeh mardor ia ka jingshim bad ka jingtih jaka da ka National Highway & Infrastructure Development Corporation Limited (NHIDCL) ha ka shnong Mawshun kaba dei shibynta jong ka project surok Shillong – Dawki kaba long pyrshah ia ka mon u paidbah.

Ha ka shithi sha ka Deputy Commissioner ka East Khasi Hills District, ka Kong RM Kurbah, u President ka VPP uba dei ruh u MLA ka Nongkrem u Bah Ardent Miller Basaiawmoit u la ong, “Halor ki jingshem bad ki jingkyrpad da ki nongialam shnong, Nga kyntu jur ia phi ba phin tuklar lem kane ka phang da kaba pynsangeh mardor ia kane ka jingshim jaka bad ka jingtih ia ki jaka da katei ka kompeni khnang ban khanglad na kino kino ki jingjia kiba lah ban mih.”

“La shem ba ki jingeh ka kham bun shuh shuh ban ia kaei kaba la sakhi, kumta na ka bynta ka jingbha bad ka jingmyntoi jong kiba bun balang donkam ban shim ia baroh kiba iadon bynta ha kane ka kam khamtam ia ki dorbar shnong bad ki bor sorkar ban pynbeit syndon ia kane ka kam shisien pynbeit,” u la bynrap.

Haba pyntip halor ki jingshem jong ki nongialam ka party halor kane kaba la jia hapoh ka shnong Mawshun ha ka 17 tarik mynta u bnai, u Bah Ardent u la ong ba ka VPP lyngba ka jingkyrpad da ki bor pyniaid shnong ka shnong Mawshun ki la pynlong ka jingleit jurip sha kane ka shnong ban ioh ia ki jingtip ba kham bniah halor kane ka phang kaba iadei bad ka jingshim jaka na ka bynta ban pynbha ia ka surok bah NH-40 Shillong-Dawki.

Ha kane ka jingleit jurip la shem ba ka NHIDCL ka la pyniaid shakhmat ia ka jingtih ia ki jaka ia kiba ym pat shym la aibor da ki trai jaka bad kaba long ruh pyrshah ia ka rai jong ka dorbar shnong.Nalor kata, ka NHIDCL ka la pynjulor ruh ia ki katto katne ki jaka jong ki nongshong shnong ia kiba kim pat shym la ioh jingbit na ka bynta ka jingshna ia kane ka surok, u la ong da kaba pyntip ruh ba ki trai jaka ki la dep ruh ban ujor da ka ejahar pyrshah ia kane ka kompeni namar ka jingpynjulor ia ki jaka, ki dieng ki siej bad ki jingthung jingtep.

“Ka long kaba thikna ba ki wah duid bad kiba bun ki tyllong um ha kylleng kine ki jaka kin shah ktah jur bad shah jingpynjot ia ki jingthung jingtep. Kan pynduna ruh ia ka jingtap jong ki khlaw bad kan ktah jur ia ka mariang ha ka thain. Ka la pynlong ruh ia ngi ban sngewthuh ba ka dorbar shnong kam shym la pyrshah ia kane ka projek surok, watla katta ki kwah pat ba kane ka surok ka dei ban long beit tang lyngba ka surok kaba la don lypa” pynpaw u nongialam ka VPP.