Dawa ka VPP na ka Sorkar ban hukum ia ki Nongsynshar Shnong ban ym pynthut ia ka jingiaid beit ka elekshon

Syllad | The Rising MeghalayaJanuary 28, 2025

Ka Seng Voice of the People Party (VPP) ha ka 28 tarik Kyllalyngkot ka la dawa na ka Tnad District Council Affairs (DCA) ba kan pynmih ia ka jingbthah sha baroh ki Nongsynshar Shnong ba kin kiar ban shim ia kino kino ki sienjam ban pynthud ban pynlong ia ka elekshon kaba iaid beit iaid ryntih.

Ha ka shithi sha u Commissioner & Secretary in-charge DCA, u General Secretary ka VPP uba dei ruh u MP ka Shillong u Dr Ricky AJ Syngkon u la kynnoh ba ka jingshim rai jong ki katto katne ki Nongsynshar Shnong, Rangbah Shnong, Sordar Shnong ka la khanglad ia ka VPP bad ia ia u kyrtong jong ka ban pynlong ia ki jingialang paidbah.

“Kumta nga kyrpad ia phi ba phin pynmih da ka jingpynbna paidbah sha baroh ki Nongsynshar Shnong, Rangbah Shnong, Sordar Shnong ban kiar na kaba shim ia kino kino ki sienjam ki ban khanglad ban pynlong ia ka elekshon kaba iaid beit iaid ryntih bad kaba donkam ia ki ban pdiang ia ki party sain pyrthei bad ki kyrtong ba kin pynlong ia ki jingialang jong ki da kaba ai ia ka No Objection Certificate hapoh ka por ba la buh naduh ba la ioh pdiang ia ka shithi, kata la ka long ha ka por ba treikam ka Model Code of Conduct ne kiwei pat ki rukom,” u la ong. 

U MP u la kdew ruh ba ki la don ki khep ha kaba ki kyrtong jong ki party ki la iakynduh jingeh ban ioh jingbit ban pynlong ia ki jingialang paidbah, jingialap elekshon na ki Nongsynshar Shnong, Rangbah Shnong, Sordar Shnong ha Rilum Khasi bad Jaintia.

“Ia ki jingbit ba la pan kim shym la mynjur ne ai hadien ka jingpynslem kaba ktah jur ia ki jingialap elekshon jong ngi. La sakhi ruh da ki kyrtong jong ngi ba ki don ki Dorbar Shnong kiba khanglad ia ki jingialang paidbah lait noh tang ki rynsan Common Platform kiba ki la khot pynlong da ma ki,” bynrap u heh ka VPP.

“Kine ki jingeh ba la kdew haneng da kitei ki nongsynshar shnong ki ktah jur ia ka hok tynrai kiba la pynrung ha ka riti synshar jong ka ri India,” u la kynthoh ha ka shithi.

Une u nongialam ka VPP u pynkynmaw ruh da kaba ong, “Ngi ki dkhot jong ka party la ka long shimet ne ka kynhun ngi don ia ka hok ban pyndonkam ia kine ki hok ba la pynkhamti da ka Riti Synshar hapoh ka Article 19 (1): Ka jinglaitluid ban kren bad pynpaw pyrthei, ka jinglaitluid ban ialum paidbah kaba jai jai bad kaba khlem rah tiar pynmynsaw bad ka jinglaitluid ban iaid ha kylleng ki jaka jong ka ri India.”

Mana ka MCC iaki Myntri Sorkar ban leit ialap elekshon da ki kali ML-01 ne kular ai skim thymmai ne buh mawnongrim thymmai

Da kaba pynpaw ba ki kyrtong bad ki seng sain pyrthei ki dei ki nongiashim bynta ba kongsan ha ka elekshon, u Dr Ricky u la ong, “Ym tang ba ki don ia ka hok, hynrei ki mihkhmat ruh ia ki jingmut bad ki sur sain pyrthei jong ki paid nongthep vote. Ka jingpynioh laitluid ia ki jingtip bad ki jingmut da ki nongthep vote, ki kyrtong bad ki seng sain pyrthei ki long kiba kongsan na ka bynta ka elekshon kaba shisha. Kumta baroh kynthup ia ki seng sain pyrthei, ki kyrtong bad ki nongkyrshan jong ki, ki don ia ka hok ban wad, ban pdiang bad aijigmut lyngba kino kino ki lad kiba ki mon kaba kynthup ia ki jingialang paidbah.”