Dawa ki lai seng ban pyllait pura ia ka Meghalaya na ka CAA; Pyntreikam mardor ia ka ILP

Syllad | The Rising MeghalayaMarch 19, 2024

Ki laitylli ki kynhun Seng bhalang ha ka 18 tarik Lber, ki la dawa na ka sorkar MDA ba la ialam da ka NPP ba kan kyntu ia ka sorkar Pdeng ba kan pyllait pura ia ka Meghalaya na ka jingtrekam jong ka Citizenship (Amendment) Act, 2019 bad ka Rules jong ka bad ruh ban pyntreikam noh mardor ia ka Inner Line Permiet (ILP) khnang ban lah ban tehlakam ia ka jingwan rung kyrthep ki briew kiba na bar sha kane ka Jylla.

Kine ki laitylli ki seng kiba kynthup ia ka Hynniewtrep Youth Council (HYC), Jaintia National Council (JNC) bad ka Confederation of Ri Bhoi People (CORP) ki la phah ruh da ka memorandum sha u Myntri Rangbah (CM) ka Jylla u Conrad K Sangma ha kaba iadei bad kane ka phang na ka bynta ban tuklar lem mardor.

Haba kren sha ki lad pathai khubor, u president ka HYC u Bah Roy Kupar Synrem u la ong, “Ngi la kyntu ia u CM ka Jylla ba un tuklar lem mardor ban kyntu ia ka sorkar Pdeng ba kan pyllait pura ia ka jingpyntreikam ia ka CAA 2019 bad ia ki Rule jong ka bad ruh ban pyntreikam noh mardor ia ka ILP ha kane ka Jylla.”

U la ong ruh ba na ka liang ka Ministry of Home Affairs ka sorkar India ha ka 11 tarik u Lber 2024, ka la pynmih ia ka Citizenship (Amendment) Rules, 2024 na ka bynta ban pyntreikam ia ki kyndon ain jong ka Citizenship (Amendment) Act, 2019.

“Watla ia ka CAA 2019 la pyllait ban pyntreikam ha ki jaka jong ki riewlum ka Jylla, hynrei ka jingshisha hi ka long ba ka Jylla Meghalaya baroh kawei kam hap satia hapoh ka Khyrnit Bahynriew jong ka Riti Synshar ka ri India. Ki dang don ki jaka ha ka nongbah Shillong, kaba dei ka nongbah ka Jylla ha kaba ki kyndon ain jong ka Sixth Schedule kim treikam bad ha kaba ki don bun bah ki poiwir kiba shong ba sah,” ong u Bah Synrem. 

Kumta u la ong ba ha kum kine ki khep lada ki briew kiba shong ba sah ha kine ki jaka ki shim kabu ia ka jingbym treikam jong ka ain ki lah ban wan rung sha kine ki jaka bad hadien ki aplai na ka bynta ban long nongshong shnong lyngba kane ka Act 2019, bad kumta ruh ha kano ka rukom ka sorkar Jylla kan lah ban khanglad ia ki ba kin ioh long kum ki nongshong shnong hapoh jong kane ka Act? Hato ki don ne em da kiwei pat ki lad ki lynti ban buddien halor ka jingdon jong kine ki briew kiba shong ba sah mynta hapoh kine ki jaka khnang ba yn lah ban buh jingkhein na ka bynta ki jingdonkam kiba hadien habud, ong u Bah Synrem.

Shuh shuh une u president ka HYC u la ong ruh, “Ngi sngewkhia jur ba wat lada kiba bun ki jaka hapoh ka jylla la pyllait na ka jingtreikam jong ka CAA 2019, hynrei ka Jylla kan shah ktah jur na ka jingwan tuid na kiwei apt ki jylla khamtam na Assam.Ka jingbym don ia kino kino ki kyndon ain ki ban tehlakam ia ka jingwan rung jong ki briew kiba na bar ngi sheptieng ba kane ka jingpyllait na katei ka ain kan long kaba pulom bad ngi lah ban iakynduh jingeh na ka jingwan tuid ki briew kiba na bar sha kane ka Jylla.”

Kumta u la ong ba ka lad ban iada na kane ka jingwan rung kyrthep jong ki briew kiba na bar shapoh ka jylla ka long tang lyngba ka jingpyntreikam noh mardor ias ka ILP bad ban pyllait pura ia ka jingtreikam jong ka Citizenship Amendment Act ha kane ka Jylla.