Dawa ki Muster Roll na ka sorkar ban pyntreikam ïaka RCW & snem shongthait

Syllad | The Rising MeghalayaAugust 18, 2019

JOWAI: Ka synjuk jong ki nongtrei Muster Roll kaba la tip kum ka All Jaiñtia Muster Roll Workers & Labour Union (AJMRW&LU) kila shim ïaka rai ban dawa na ka sorkar ban pyntreikam salonsar ha baroh ki tnad ïaka Meghalaya Regular Casual Workers Scheme 1996 (MRCW) bad ban pynmih da ka hukum ban pynbna aka snem shongthait jong ki muster roll haka jinglang paidbah kaba saw jong ka AJMRW&LU kaba long haka sngi Saitjaiñ ha ïungwalieh jong ka Dorbar Shnong Panaliar.

Ha kane ka jingalang paidbah ka AJMRW&LU kaba la wan plie ïaka da u ma Comingone Ymbon, Myntri ka tnad Fisheries bad kiwei haka jingkren jong u, ula kular ba ha u bnai Nailur mynta u snem yn pyllait ïa baroh ka arrear jong ki nongtrei Muster Roll kaba ki dang dei ban ïoh na ki tnad sorkar bapher bapher.

Ula kular ruh iaki muster roll ba un ïakren bad u Myntri Rangbah ka Jylla iaki mat jingdawa bala buh ka synjuk muster roll- All Jaiñtia Muster Roll Workers & Labour Union (AJMRW&LU).

U President jong ka AJMRW&LU U Khroo Lamsalangki Pariat ula ong ba nalor ka MRCW ha katei ka jingalang ki Muster Roll da kawei ka sur kila shim ïaka rai ban dawa na ka sorkar ban pynbna paidbah ïa ka snem shongthait jong ki nongtrei Muster Roll namar ba haduh mynta kam don kano kano ka hukum ba ban pynthikna ïaka snem shongthait jong ki la ka dei 58 snem, 60 snem ne 65 snem.

Kawei pat ka rai ka dei ban dawa na ka sorkar ban pyntreikam salonsar ïaka jingkyntiew kyrdan ïa ki Muster Roll kiba la trei san snem shaneng sha ka kyrdan skilled na ka unskilled. Kiba la trei duna shiphew snem dei ban ithuh kum ki RCW Skilled Workers bad kiba la trei palat shiphew snem kum ki RCW highly skilled.

Ha kane ka jingïalang ïaka kila thaw iaka Muster roll workers and Labour consumer & thrift Co- operative society Ltd.

Ha kane ka jingïalang jong ki AJMRW&LU la wan da ki hajar hajar ngut ki muster roll na kylleng ka Rilum Jaiñtia kynthup ïaka synjuk ki nongshet ja sngi-All Jaiñtia Mid Day Meal Workers Union (AJMDMWU), ka tnad jong ka AJMRW&LU.

Ha kane ka jingialang paidbah la pynsngew iaki jingtreikam ka seng bad ka jingiaid lynti halor ki mat jingdawa bapher bapher kiba la buh ha khmat ka sorkar bad la rai ban buddien khnang ba ka sorkar kan pyntreikam noh ïaki mat jingdawa jong ka union.