Dawa ki nonghikai Deficit ba la shongthait ban kyntiew ia ka DCRG sha ka T.10 lak kumjuh ia ka bai bam tymmen

Syllad | The Rising MeghalayaDecember 18, 2023

Ki Nonghikai Deficit bala shongthait hapoh ka shatri Meghalaya Retired Deficit School Teachers Association (MRDSTA) kila dawa naka Sorkar Jylla ba kan kyntiew ia ka Death-cum-Retirement Gratuity (DCRG) na ka T.3.5 lak sha ka T.10 lak bad ruh ban kyntiew ia ka bai bam tymmen jong ki Nonghikai.

Ki nongialam ka MRDSTA kila pyntip ruh ba kan sa don ka jingialang ha u bnai Lber 2024 ha Garo Hills ban iakren halor kine ki mat jingdawa bad lada ka Sorkar ka dang sngap mynthi, ki Nonghikai bala shongthait kim banse ban mih madan ban bad pynlong da ka jingiakhih wat hapdeng ka jingnoh rta.

Haba kren sha ki lad pathai khubor u President ka MRDSTA u Bah E Nongsiang ula iathuh ba naduh 2020 ka seng kala dawa na ka Sorkar Jylla ban kyntiew ia ka DCRG na ka T. 3.5 lak sha ka T. 10 lak hynrei haduh mynta ka Sorkar kam pat shym la shim ia ki kino kino ki sienjam ban kyntiew ia ka DCRG.

U Bah Nongsiang ula iathuh ba ki don haduh kumba 3000 ngut ki Nonghikai Deficit bala shongthait hynrei haduh mynta kim pat ioh ia ka bai bam tymmen (Pension) watla don napdeng ki Nonghikai kiba la shongthait la palat 20 snem.

“Ka Sorkar Jylla kala kyntiew ia ka DCRG hynrei tang na ka bynta ki Nonghikai kiba shongthait naduh u snem 2017 haduh 2022 hynrei ngi la dawa na ka Sorkar ban kyntiew lang ia ka DCRG na ka bynta ko Nonghikai kiba shongthait hashuwa u snem 2017 bad hadien 2022” la ong u Bah Nongsiang.

Ha kaba iadei bad ka bai bam tymmen u Bah Nongsiang ula iathuh ba ka tnat Pule Puthi kala pynkhreh da ka Meghalaya Non-Government Deficit Schools and Techers Employees Rule 2023 hynrei haduh mynta ka Sorkar Jylla kam pat ai ia ka jingmynjur.

Shuh shuh ula iathuh ba haduh mynta, u Myntri Rangbah ka Jylla u dang shu kular tang da ka ktien namar haduh mynta ka Sorkar Jylla kam pat ai ka jingmynjur ia ka Meghalaya Non-Government Deficit Schools and Techers Employees Rule 2023.