Dawa ki nongtrei ka MCCL ban pyllait noh ia ka song pisa shwa ban kut une u bnai

Syllad | The Rising MeghalayaJanuary 21, 2025

Ki nongtrei hapoh ka synjuk jong ka Mawmluh Cherra Cements Employees Union (MCCEU) ki la dawa na ki bor pyniaid jong ka kompeni ba kin pyllait noh ia ka song jingiarap pisa bad ia ka installment kaba nyngkong jong ka skhim ba kyrpang ba la tyrwa ban ai sha ki nongtrei hashwa kaba kut jong une u bnai Kyllalyngkot.

Ia kane ka rai la shim ha ka jingialang jong ka Union kaba la long ha ka 20 tarik Kyllalyngkot.

Ha ka shithi sha u Managing Director ka MCCL ka MCCEU ka la ong, “Ia ka jingiarap song pisa bad ia ka installment kaba nyngkong jong ka skhim ba kyrpang ba la tyrwa sha ki nongtrei ka MCCL dei ban pyllait noh shwa kaba kut jong une u bnai Kyllalyngkot kumba la kular da ka Joint Committee kaba la long ha ka 16 tarik u Nohprah 2024 ha Secretariat hapdeng ki bor pyniaid, u MLA ka Sohra bad Shella lem bad ki nongtrei.”

“Lada kam don kano kano ka jingshim khia ne ki sienjam ban pynurlong ia kane ka jingdawa ka jong ngi, ngin sa shim da kiwei pat ki sienjam hadien ka jingiasyllok bad baroh ki nongtrei,” kala maham MCCEU.