Dawa ki samla ba pyndep eksam Nurse bad ANM na ka Sorkar ban pynkloi ia ka jingkhot thep kam

Syllad | The Rising MeghalayaOctober 7, 2024

Ki samla kiba la pass ia ka eksam na ka bynta ka kam Staff Nurse bad ANM ha ka 7 tarik u Risaw ki la dawa na ka Sorkar Jylla ba ka dei ban pynkloi ban khot pynlong noh ia ka physical verification khnang ban ioh sdang noh ia ka jingpynrung kam.

Haba kren sha ki lad pathai khubor, ka samla Merybahun Marbaniang kawei na kiba la pyndep ia kane ka eksam ka la ong ba kim long pyrshah ia ka jingdawa jong kawei pat ka kynhun ki samla ban pynsangeh ia kane ka jingpynrung kam, hynrei ki kwah ban pynkynmaw ia ka sorkar ba ki la pass ia ka eksam lyngba ka jingtrei shitom.

Ka la ong ruh, “Ngi dei kiba pa pass ia ka eksam ba la pynmih ha ka 28 tarik u Nailur ba la dep. Kumta ngi kwah ban kyrpad ia ka sorkar bad ka Meghalaya Medical Service Recruitment Board (MMSRB) ban pynlong noh kloi ia ka physical verification na ka bynta ki samla kiba pass khnang ban pynthikna ba ym pynslem shuh ia ka jingthungkam na ka bynta ki Staff Nurse bad ANM.”

Ha kaba iadei bad ka jingpyrshah jong kawei pat ka kynhun kaba la kynnoh ba ka don ka jingleh bym hok ha ka jingpynbna ia ka result, ka Merybahun ka la ong “Hooid ngi don ka jingsngew na ka bynta jong ki, hynrei pat ngi hap ban ieng halor ki jingshisha. Ngi hap ban sngewthuh ba ka dei ka competitive exam, ngi hap ban ia aireng hapdeng jong ngi namar ki don haduh 5000-6000 ngut kiba iakhun tang na ka bynta ki 164 tylli ki post.

Katba na ka liang u samla Iaishemphang Wankhar u la ong, “Ka MMSRB ka la dep ban pynshai halor ki jingshisha. Ngim don eiei ban kynthoh pyrshah ia kane ka kynhun hynrei ngi ruh ngi la trei shitom ban pass ia ka eksam. U la ong ba kito ki para samla ba thoh ia ka eksam ruh ki lah ban thoh ha ka Grievance Cell jong ka MMSRB bad ka Board ruh kala ai por 10 sngi ia ki samla ban ioh ka jingpynshai halor ki jingkynnoh leh bym hok ha ka jingpynbna ia ka Result.”

Nalor kata u la ong ruh, “Ngi sngewkmen halor ka jingpynbna jong ka MMRSB ia ka Result namar ka long kaba khuid ba suba namar wat ha ka por thoh ia ka eksam ruh ki don ki nongring dur ha man ki jaka thoh eksam.”