Dawa ki sengbhalang iaka UDP, PDF, HSPDP ban mih na ka MDA ym ban pyrshah CAB tang haki khubor

Syllad | The Rising MeghalayaDecember 11, 2019

JOWAI: Ki sengbhalang ba kynthup iaka JSM, JSU, MUPF, EJNC, SBYWA kila pynrem jur iaka Agatha Sangma ka MP jong ka seng National People’s (NPP) na Rilum Garo Hills kaba la jingkyrshan iaka Citizenship (Amendment) Bill 2019 bad kila dawa ruh iaka UDP, HSPDP, PDF ban weng ka jingkyrshan naka sorkar MDA kaba ialam ka NPP namar ba kala kylla iaka sur jong ka da kaba pyrshah sha kaba kyrshan iaka CAB ha Lok Sabha.

“Ka Agatha Sangma ka MP ka seng NPP kala pyni ïaka dur ba shisha jong ka bad ka party NPP hadien ba kala ai ka ijngkyrshan hapoh ka ïing dorbar Lok Sabha iaka CAB haka sngi Nyngkong. Kumta ka UDP ka dei ban weng ka jingkyrshan naka MDA lada ka ied iaka jaidbynriew riewlum bad rit paid ka Jylla,” ong u President ka JSM u Leningstar Rymbai, uba la dawa ruh ban pyntreikam noh iaka ILP ha Jylla.

“U Conrad K Sangma u nongialam ka MDA kum u Chief Minister ula phiel hadien baka para jong ka Agatha Sangma National President ka party ka kyrshan ïaka CAB.,” la ong  u Leningstar bad bynrap ba lada ki nongmihkhmat ne ki MLA jong ka UDP bad kiwei ki seng sain hima kiba kyrshan iaka MDA kim weng ialade naka MDA ka mut ba ki ruh ki kyrshan iaka CAB bad u paidbah u dei ban ai jingsneng ia baroh ki MLA kiba mynta haka elekshon 2023.

Ka MPUF ka pynpaw ia ka jingsngewkhia kaba khraw halor ka jing kyrshan jong ka Agatha K Sangma, MP jong jylla bad u Lat ka jylla Tathagata Roy iaka CAB.

Ka MPUF ka pynpaw ia ka jingbitar ia u Lat ka jylla Tathagata Roy bad iaka Agatha Sangma MP ka jylla ba kila  kyrshan ia ka CAB ka bill ba wanrah daka sorkar BJP wat la ki tip ba kane ka bill kan ktah iaka jaidbynriew rit paid ka jylla.

Ka MPUF kala dawa iehnohkam ia u Tathagata Roy kum u Lat bad ka Agatha Sangma kum ka MP namar ba ki pyrshah iaka mon bad ka sur jong u paidbah ka Jylla bad ka thain shatei Lammihngi baroh kawei.

Ka MPUF ka pynrem iaka BJP kaba la iuhroit ia ka hok longtrai jong ngi ki rit pait da kaba wanrah ia ka CAB.

U Michal Chyrmang, President MPUF ruh ula dawa n aka UDP, HSPDP, PDF ban weng jingkyrshan naka MDA namar ba ka party kaba ialam ia kane ka sorkar ka NPP kala kylla sur bad shet ia u paidbah.

Ka Southern Border Youth Welfare Association (SBYWA), Elaka- Lakadong & Rymbai, East Jaintia Hills District kala pynpaw ba ka jingpynlong ain iaka CAB kan ailad ïaki jaidbynriew na ka niam Hindu, Sikh, Buddhist, Jain, Parsi bad ki Khristan na Bangaldesh, Pakistan bad Afghanistan ba kin nym shah khein poiwir bad ban pynioh syrnod nongshong shnong ka Ri India. Kane ka buh jingeh iaka jylla bad ka shah thombor ha kine poiwir bad ka jylla kan shah tyllep ha kine ki nong buhai shnong.

Ka SBYWA ka ai jingkyrshan iaka North East Students’ Organization (NESO) bad Kumjuh ia ka CoMSO bad kiwei kiwei ki seng ha kino kino ki jingiakhih jong ka na ka bynta ka iap ka im jong jaidbynriew

Kane ka seng ka dawa na u Lat ka jylla ban ai muhor noh ia ka MRRSA 2019 khnang ba kane ka ordinance ba kan treikam ban tehlakam iaka jaidbynriew n aka jingwan buhai shnong u nongwei.

Ka JSU ruh kala pynrem jur ia ka  jingshet kylla ka Agtha da kaba kyrshan ia ka CAB ha Lok Sabha bad ka jingleit shim bynta u CM kum u kongsan ha ka phutbol ba lah pynlong ha Wahiajer haka sngi ba Ar khlem burom iaka jingkhot pakhang shnong ka NESO.

Ka JSU kala kynthoh bad pynrem jur ia ka jingleh u Myntri Rangbah kumjuh ia ka party NPP ba ki lah shet kylla ia ka nong shong shnong ka jylla bad kumjuh ia ka North East baroh kawei .Ka seng JSU ka dawa ruh ia ki seng riewlum ba ki dei ban weng mardor ialade na kane ka sorkar MDA namar ba u Myntri Rangbah ula leh bym suidniew ia ka jingsngew jong u paidbah

Kawei pat ka seng ka EJNC kaba don haka shatri jong ka Confederation of Social Meghalaya Organisation (COMSO), ka pynpaw iaka jingsngewkhia kaba khraw halor ka jing Kyrshan jong ka Agatha K Sangma, MP jong ka NPP iaka Citizenship Amendment Bills 2019 jong ka Sorkar BJP.

Ka Jylla Meghalaya baroh kawei kumjuh ka sorkar jylla ka bala lamkhmat daka NPP ki dang pyrshah jur iaka CAB, daka jingtieng ioh ba ngin sha thyllep noh ha kita ki poiwir ki ban wan na Bangladesh lyngba kata ka CAB, pynban kane ka MP jong ka NPP napoh Tura Constituency, ka kyrshan ia kane ka jingthmu buitpoh jong ka sorkar BJP ban pynduh jait iangi ki rit paid bad kane ka jingkyrshan ka Agatha iaka CAB ka dei ka jingshet kylla ia u nongshong shnong ka Jylla.

Ka EJNC ka dawa na Myntri Rangbah ka jylla uba long ruh u President jong ka NPP u dei ban pynshai halor kane, bad lada um lah ban pynshai ka pyni baka NPP ka ialeh kai Politics bad ka iap ka im jong ka Jaitbynriew.

Ka EJNC kala dawa na kiwei ki seng sain hima kiba don hapoh ka MDA ba ki dei ban pyni da ka kam hadien baka NPP ka kyrshan iaka CAB, bad kim dei ban pyrshah Cab tang haki kot khubor.