Dawa pan map ka BJP na u MLA ka NPP namar ka jingkynthoh kaba ktah ia ki nongkyrshan ka party

Syllad | The Rising MeghalayaApril 4, 2024

U Vice President ka BJP ka Jylla uba dei ruh u MDC ka Tura u Bernard N Marak haka 3 tarik Iaiong, u la dawa pan map na u MLA ka NPP na Mahendraganj u Sanjay A Sangma halor ka jingkynnoh kynthoh pyrshah kaba ktah jur ia ki nongkyrshan jong ka BJP hapoh Garo Hills.

Ha ka shithi sha u National president ka NPP uba dei ruh u Myntri Rangbah ka Jylla u Conrad K Sangma, u Marak u la ong, “Lyngba ka jingkyrpad jong ki nongkyrshan ka BJP bad ki nongshong shnong kiba dei ki Hindu hi baroh, Nga kyrpad ba u Sanjay Sangma u dei ban pan map mardor. Kane ka jingpan map ka jong u ka dei kaba kongsan khnang ba kan ym ktah ia ka jingsngew jong kiba bun ki nongkyrshan ka party bad khnang ban lah ban pynkohnguh ba kin aijingkyrshan ia ka NPP.”

“U (MLA) u dei ruh ban kiar na ki jingkren kiba banbein kum kane kaba la jia pyrshah ia ki nongkyrshan ka BJP bad khamtam kito ki nongshong shnong kiba dei ki Hindu,” u la ong.

U la ong ba ka BJP ka la shim ia ka NPP kum ka paralok synrop bad ka la ju iai kyrshan ia ka NPP ha kine ki snem kiba la leit noh ha ka por ba pynlong ia ki ilekshon Lok Sabha.

Nalor kata une u MDC ka BJP u la ong ruh ba ka party BJP ka la burom ia ka hukum jong ki nongialam napoh Delhi na ka bynta ban ai ka jingkyrshan ha kane ka ilekshon Lok Sabha ka ban wan da kaba weng noh ia ka jingthmu pynieng kyrtong, hynrei ki jingkynthoh pyrshah ia ki nongkyrshan ka BJP lyngba ka jingkren jong u Sanjay Sangma MLA ka Mahendraganj ha ka jingialang kaba u CM ruh u la ia don lang ka ktah jur ia ka jingsngew jong ki nongkyrshan ka BJP khamtam kito ki nongshong shnong kiba dei ki Hindu hapoh Garo Hills.

U Marak u la ong ba une u MLA Sanjay Sangma u la pynjah burom ia ki jaidbynriew Koch, Hajong bad kiwei pat ki bar jylla kiba dei ki nongshong shnong Hindu hapoh Garo Hills da kaba kam ba kim don jaka shuh ban vote shano shano ruh namar ka NPP ka la pynshong noh ia u kyrtong ka BJP.