Dawa buh Police Out Post ka KSU ha khappud Meghalaya Assam, kular u Myntri Kam Pohiing ha Mukroh

Syllad | The Rising MeghalayaJune 18, 2019

SHILLONG: Ka Khasi Students’ Union (KSU) Laskeiñ Circle hapoh ka jingïalam u Balawan Suchiang President bad u Paul Lakhon Sutnga Secretary kila leit ban ïakynduh bad ai dorkhat ha u Myntri Kam Pohïing ka Jylla u James K Sangma haka sngi ba ar ban dawa ban buh Police Out Post ha Psiar bad Mukroh bad ban kyntiew kyrdan ka Police Out Post ha Raliang.

Ka KSU Laskein Circle kala dawa ban buh ktem pulit ha kite ki ar tylli ki shnong namar ka jingbym shong shngaiñ ki paid Khasi Pnar kiba shong ba sah ha Khappud Assam Meghalaya.

Ka KSU haka dorkhat kaba la ai sha u Myntri Kam Pohïing kala pynpaw ba ki paidbah ba shong ba sah ha khappud ja ka Jylla bad ka West Karbi Anglong District, Assam ki hap ban im bad ban shong ba sah ha ki shnong ki thaw jong ki haka jingsyier mynsiem tang namar ka jingakhajia pud sam hapdeng ki ar jylla ka Assam bad Meghalaya.

Bun bun sien ki Pulit Assam bad ki tnad Kam Khlaw jong ka Assam na kapor sha ka por ki pyndik bad thombor ïa u paidbah ba shong ba sah ha kahppud naduh na Psiar, Khatkasla bad kiwei kiwei ki shnong ba marjan ha khappud da ka jingiatreilang ki briew kiba na ka jaidbynriew Karbi bad ki seng kieng atiar, la kynnoh ka KSU haka dorkhat kaba la ai sha u Myntri Kam Pohïing ka Jylla.

Halor kane ka kam ka KSU kala pynpaw ba ka donkam kyrkieh ban don ka Police Outpost jong ka Jylla haka shnong Psiar, West Jaiñtia Hills of Meghalaya namar ba kane ka shnong ka hap hapoh ka Jylla bad ka jaka thep vote jong ka kadei ha ka shnong Tum Tum. Ka tnad ka koit ka Khiah ruh kala buh iaka sub center bad ka MeECL ha kine ki khyndiat snem kala dep ban ding ia katei ka shnong bad kam dei satia ka jaka kaba hap hapoh ka jaka ba iaknieh kumba kam ka Assam.

Ka KSU kala kynthoh jur ruh ba haka por ka jngsynshar ka sorkar MUA kaba ïalam da u Dr. Mukul Sangma kum u Myntri Rangbah ka Jylla, u HDR Lyngdoh kum u Myntri Kam Pohïing ruh kila leh bymsuidniew ïaka jingdawa jong ka bad u paidbah ban wanrah ka jingshong shngaiñ ki paidbah Khasi Pnar ha thaiñ khappud.

Dei halor kane ka nongrim ka KSU kala kyrpad ïa u Myntri Kam Pohïing ka Jylla u James K Sangma ban shimkhia ban iarap ïaki paidbah khappud kumjuh ban wanrah ki kam pynroi khnang ba kin roi ki par.

Ka KSU kala pynpaw ba ka donkam kyrkieh ban don kine ki out post ha kitei ki ar shnong namar ba bun ki riew shimkabu bad ki runar kiba suba jur ki riew kieng atiar na Assam ki shait pyndik bad leh ki kam thombor a u paidbah haduh ka shnong Barato.

Na kaliang u Myntri Kam Pohïing ula ong ba ym lah ban buh ïaka Police Outpost ha Psiar ne Mowlaber, la kam ka KSU ba ong u Myntri Kam Pohiing. Hynrei na kaliang ka KSU ka dawa bad pynbor a u myntri ban buh Khatkasla bad u Myntri ula ong ba u un sa wad bniah ban pynthikna ïakane ka jaka la ka biang ne em ban buh outpost.

Ha kaba iadei bad ka jingkyntiew kyrdan ïaka Raliang OP sha ka Police Station, ula kubur ba ka Raliang kala dei hi ban kyntiew kyrdan sha ka Police Station namar ba heh u pud u sam ba ka hap ban peit ban ai jingshakri ia u paidbah, hynrei ka shong haka pla tyngka jong ka sorkar.

Katba ka Police Out Post ha Mukroh pat un sa phah jurip ïaka jaka la ka hap ne em haka jaka ba iakhajia bad lada kam don kano kano ka jingiakhajia ula kular ban buh Out Post ha Mukroh.