Dawa Police Outpost ka Dorbar Shnong Barato

Syllad | The Rising MeghalayaAugust 27, 2019

SHILLONG: Ka Dorbar Shnong jong ka Shnong Barato kala leit ban ai dorkhat sha u Myntri Kam Pohïing ka Jylla u James K Sangma ha ka sngi ba ar ban dawa na u ban buh Police Out Post haka shnong Barato ban tem ïaki kam runar ruser kiba la jyllei katba nangmih ki sngi.

U MDC ka thain u Ma Aiborlang Shadap, ula ong ba kila ai dorkhat ha u Myntri Kam Pohiing ka Jylla ban pynkynmaw ïaki jingdawa kiba la buh ha khmat ka sorkar da ki phew snem ban kyrpad ban buh ïaka Police Out Post haka shnong Barato ban tem ïaki kam sniew. Ula ong kane ka shnong ka hap ha khappud Meghalaya-Assam bad naka por shaka por ki nongshong shnong ki shah pyndik ha ki briew jong ka Assam.

Ula ong ba ka shnong Barato, ka hap hapoh ka Nartiang Polcie Station hynrei ba ka jngai ka jaka kim lah satia ban beh sha Nartiang haba jia kino kino kam sniew.

Ula ong ba u Myntri kam Pohïing ula ong ba un shimkhia ban peit halor kane ka jingdawa ban buh ïa ka ktem Pulit ha katei ki shnong ban shong shngain ki paidbah.

Ka Dorbar Shnong Barato kala pynkynmaw ïa ki jingjia ha ki por mynshuwa ba dang khlain ki seng kaikhlaw Karbi ha katei ka thain ka jur bah ka kam pyntriem jong ki bad mynta pat kiwei pat ki kam sniew kiba la jyllei ka dei ka jingkhaii beaiñ ïaki masi bad u droks ruh ula suh thied sha katei ka thain nalor ki batbor, pyniap briew bad kiwei kiwei.

Ka Dorbar Shnong Barato kala kyrpad ïaka sorkar ban buh ïa katei ka ktem pulit ha katei ka shnong katba lah kloi namar ba kane ka shnong kan pynkhreh ruh ïaka jingiaseng Synod kaba long ha u snem 2021. La ong ba da ka jngbuh ia kane ka ktem pulit kan iarap ruh iaka shnong ha kaban pyniaid kali ha katei ka jingiaseng bad ban pynneh ruh iaka shongsuk shongsain ha katei ka thain.

Ha kane ka jingleit ai dorkhat ka Barato la iadonlang ruh u MLA ka thain u ma Nujorki Sungoh bad ki nongialam shnong ka Barato.