Ba hiran ka ioh ka kot, dawa pyllait ka JHTOA ia u dewiong bala dep tih 32 lak metric ton

Syllad | The Rising MeghalayaAugust 31, 2022

Na ka daw jong ka jingkyrduh haka kamai kajih, ka seng ki trai trok ha rilum Jaintia hapoh ka lama Jaintia Hills Truck Owners Association (JHTOA) ka la rai ban dawa na ka sorkar Meghalaya Democratic Alliance (MDA) ba kadei ban pyllait mar dor ïaka challan na bynta ban kit ïa u dewïong ba la dep tih bad thew uba poi 32 lak metric ton.

U president ka JHTOA u Ma Biangshwa Shylla ula ong ia kane haka sngi Balang hadien ba la wai ka jingïalang General Meeting kaba la long ha phyllaw ka ophis treikam jong ka JHTOA kaba don ha Tuber Takhniang.

Ula ong shuh shuh ba kane ka jingpynslem ka sorkar ban pyllait ban kit ia u dewiong bala dep tih ka buh jingeh ia kine kiba bun kiba im ja kpoh na ka kam khaii dewiong.Ula banjur iaka sorkar ban shimkhia ban pynsted ban pyllait iaka challan namar ba kane ka kam ka sahteng haduh mynta bad ka daw ka tip khambha ka sorkar.

Ula ïathuh ba haka jingïalang la rai ban sdang noh ïaka jingpynrung dkhot ne membership hapoh ka seng ka ban sdang naduh ka 1 tarik Nailur haduh 30 tarik Nailur bad kyntu ruh ïaki trai trok ban pynrung dkhot lym kumta ka seng kan nym bahkhlieh lada jia ïakynduh jingeh ha kino kino ki jingïaid lynti jong ki.

Haba ïadei bad ka rukom ai slip, la rai ban ai kawei ka slip kawei ka trok da kaba wanrah lang bad ka trok hakhmat ophis ka seng ha Tahkhniang namar bunsien haba shim slip khlem ka trok ka wanrah ka jingklumar bad pyndonkam bakla ïaka slip.

Haba ïadei bad ki trok khamtam ki 16-18 shaka shaneng, ula ong ka seng na ka por sha ka por ka juh ka pyrshah jur ïa kane bad ha kane ka kynti ruh ka seng kan nym pdiang ia kine ki trok ban kit ïaki mar ba pynmih napoh ka District.

Shuh shuh ula ong wat la ka JHTOA kade ka seng kaba la rim hapoh ka District kaba la seng naduh u snem 1982 hynrei haduh mynta kam pat don ïaka ïing treikam hynrei kaba sngew tynnad ka long ba haka jingïalang la rai da baroh ki dkhot ban tei noh ïaka ïing treikam ba pura jong ka seng ha Phramer, West Jaintia Hills District.