Dawa pyndam ka HNYF ia ka ‘Land Bank’ namar ka long pyrshah ia ka Land Transfer Act

Syllad | The Rising MeghalayaJanuary 17, 2025

Ka Seng Hynniewtrep National Youth Front (HNYF) ha ka 16 tarik Kyllalyngkot ka la mih syndon sha surok ban pynlong da ka jingiakhih ha ka nongbah Shillong ban pynpaw ka jingpyrshah ia ki kyndon jong ka Meghalaya State Investment Promotion and Facilitation Act, 2024, bad ban pynduh pyndam noh ia ka jingthmu thied bad pyniaid jaka (Land Bank) katkum kane ka Act namar ka long pyrshah ia ka Meghalaya Transfer of Land (Regulation) Act, 1971.

Kane ka la wan long ruh tang shi sngi hadien ba ka kynhun Myntri ka la mynjur ia ka kyndon ba la pynbeit thymmai jong ka Meghalaya State Investment Promotion and Facilitation Act, 2024, kaba thmu ban pynthikna ba kan ym don ka jingiaid lait ia ka Meghalaya Land Transfer Act haba pynshlur ia ka jingwan bei tyngka bad seng ia ki kam ba kongsan hapoh ka jylla.

U President rangbah ka Seng HNYF u Bah Sadon Blah haba kren sha ki lad pathai khubor u la ong, “Ngi donkam ia ka jingbei tyngka bad ngi donkam ruh ia ki karkhana, hynrei kane ka jingthmu ban wanrah ia ka land bank ka long kaba ma shibun ia ka jylla.”

Nalor kata u pyntip ruh ba ka seng ka la dep ban phah ia ka shithi sha u Myntri Rangbah naduh ka 20 tarik u Nohprah ba la dep ban pynpaw ka jingbym sngewtynnad halor kane ka jingthmu thied jaka jong ka sorkar ia kaba yn sa ai pat sha ki kompeni bapher bapher.

U Bah Sadon u la kynnoh ruh ba ka Meghalaya State Investment Promotion and Facilitation Act, 2024 ka long beit beit pyrshah ia ka Meghalaya Transfer of Land (Regulation) Act, 1971 bad ia ka rukom bat khyndew ha ka jylla. “Ngi la iohi ba ka sorkar ka thmu ban weng noh ia ka kyndon 34 jong ka MSIPF Act, ha kaba ka phang jong kane ka kyndon ka ong, “Ka bor ban iaid ia kiwei pat ki Act” kaba kynthup ia ki riti bat khyndew hangne, hynrei kata kam pat biang satia namar ka jingthmu jong ka Investment Meghalaya Agency (IMA) hangne ka long ban thaw ia ki land bank.”

Pynbeit thymmai ka Sorkar ia ka Investment Act ban pynthikna ban ym iaid lait ia ka LTA ha ki jingseng kam ha ka Jylla

“Katba kane ka jingthmu ban thaw ia ka land bank ka dang don, kan don ka jingiatyngkhuh bad ka Meghalaya Land Transfer Act. Kumta ngi kwah ban phah ia ka khubor ba ka jingpyndam noh ia ka kyndon 34 ka dei kaba pdiang sngewbha, hynrei kane hi ka jingmut ban thaw ia ka land bank ka long kaba ma ia ka rukom bat khyndew ha ka jylla,” ong u Bah Sadon.

Une u nongialam ka HNYF u la ong ruh ba ka seng kan sa shong ia ka jingialang CEC ha ka taiew ban wan ban shim ia ka rai halor ki sienjam ban pyntreikam lada ka sorkar kam pynsngap ia kane ka jingdawa.