Dawa pynduh ka KHNAM ia ka kolshor VIP hadien ba iap aksiden ha Ri Bhoi

Syllad | The Rising MeghalayaNovember 18, 2024

Ka Khun Hynniewtrep National Awakening Movement (KHNAM) ha ka 17 tarik u Naiwieng ka la dawa ban pynduh pyndam noh mardor VIP Culture ne ka jinglong ba khraw ha ka Jylla hadien ka jingiap jong uwei u samla bad ka jingmynsaw jong uwei pat ha ka jingjia tyngkhuh kali ba dang shen ha Ri Bhoi District.

“Ngi pynrem jur ia kaba kum kane ka VIP Culture bad ka la dei ka por ban pynduh pyndam mardor ia kaba kum kane ka rukom treikam,” ong u Working President ka KHNAM u Bah Thomas Passah lyngba u kyrwoh.

“Ka jingjia ba dang shen ha kaba ka jingiaid lynti jong ki VIP ka la wanrah ia ka jingiap jong uwei u samla bad pynmynsaw jur ia ka paralok jong u ka buh jingma shibun namar kane ka kolshor VIP ha ka jylla ka jong ngi,” u la ong.

U Bah Thomas u la kdew ruh ba ka iingbishar Supreme Court ha ka mukotduma jong u Abhay Singh pyrshah ia ka Sorkar India ka la shim ia ki kali light saw kum ka jingma bad ong, “Ka jingdon bun jong kito kiba pyndonkam ia ki kali light saw kim burom ia ki ain jong ka ri bad ki banbein ia ki riew paidbah. Ka Supreme Court ka la kdew ruh ba ka jingpyndonkam ia ki light saw ha ki kali jong ki nongmihkhmat bad ki heh sorkar kam don ka jingianujor ha ki ri synshar paidbah ha ka pyrthei. Ka leit ka wan jong kine ki VIP da ki kali light saw ka la wanrah ia ka jingdheng kali, ki jingjia tyngkhuh kali bad ki jingeh ia ki riew paidbah.”

“Ngi sngewlem na ka bynta kiba haiing hasem halor kane ka jingduh noh, bad namar la dep ban mudui da ka ejahar kumta ruh ka long kaba kongsan ba kito kiba donkti ha ka jingpyni bor kaba lam sha ka jingiap jong ki riew paidbah ki dei ban ngat mardor ha ka jingshah pynshitom,” dawa u nongialam ka KHNAM.

“Ka jingjia ka dei kaba tynrah bad phet krad na ka jaka ba jia (hit and run case), kumta katkum ka kynhun Section 106(2) jong ka Bhartiya Nyaya Samhita, 2023 nalor kiwei pat, ngim kwah ban iohi ia ka jingiaid suki ka mukotduma bad ban shu leh klet noh hadien ba ki paidbah lehse ki la ia klet noh ia ka jingjia,” u la bynrap shuh shuh.