Dawa pynhiar bai kali ka KSU FKJGP na DTO, khot jingialang ka AJTCVA haka 19 tarik

Syllad | The Rising MeghalayaFebruary 18, 2021

Ki ar tylli ki sengbhalang kiba kynthup ia ka Khasi Students’ Union (KSU), Jaintia Hills District Unit bad ka Federation of Khasi Jaintia and Garo People (FKJGP), Jaintia Zone, hadien ba ki paidbah ba bun kila pynpaw ka jingeh halor ka jingkiew palat ka bai kali ha rilum Jaintia kila leit ba kynduh bad u District Transport Officer (DTO), West Jaintia Hills District namar ki nogniah kali ki shim bai kali kum haka por khangdam.

“Mynta ka sorkar kala ailad ban kit passenger kumba ju long, hynrei ka dor bai kali pat ki shim haka dor kaba shongkali haka por khangdam kaba la wanrah jingeh iaki paidbah salonsar ba shong da ki kali kamai,” la ong kine ki ar seng bad kila dawa na u DTO ban tuklar bad ban pynbeit iaka dor bai kali bad ban shim khia ban peit iaka jingeh ki nongshong kali kaba la ktah iaka leit ka wan jong ki namar ba la rem ka bai kali.

Ki nongialam jong ka KSU bad FKJGP ba kynthup ia u D.S. War Chief Organising Secretary FKJGP Jaintia Zone bad u bah Ohibait Dkhar President KSU Jaintia Hills Unit kila ong “Ngim pyrshah ia ka dor bai kali ba thymmai, hynrei dei ban don ka jingkhein bad ka jingsngewthuh lang, khnang ba kan ym ktah ia ki paidbah ba shong kali kamai.

“Mynshwa ka bai kali ka long T.50/- mynta pat T.100/-. na ka T.80/- sha ka T.150/-, na ka T.100/- sha ka ka T.200/-,” la ong ki nongialam jongka FKJGP bad KSU.

Ka All Jaintia Tourist & Commercial Vehicle Association (AJTCVA) kala khot iaka jingialang haka 19 tarik une u bnai ha Conference Hall Paradiso, Jowai ban iakren iaka dor bai kali hadien ka jingpynhiar dor ka sorkar iaka petrol bad diesel T.7/-.

U Mihsalan Dhar, u publicity secretary AJTCVA, ula ong ba ha kane ka jingialang AJTCVA kala khot iaki sengbhalang kumjuh iaki synjuk waheh shnong Ri Jaintia ban iakren sani halor bai kali ha kane ka jingialang.