Dawa pynkiew tulop ka Seng All Meghalaya 4th Teachers Association

Syllad | The Rising MeghalayaJuly 19, 2024

Ka All Meghalaya 4th Teachers Association ha ka 18 tarik Naitung ka la kyntu ia ka jingtuklar lem jong u Myntri ka tnad Pule Puthi u Rakkam A Sangma ban pynkiew noh ia ka tulop jong ki palat 1521 ngut ki nonghikai 4th Teacher ha ka jylla.

Na ka liang u President ka seng u Tengsrang Sangma u la ong, “Ngi la iakynduh ia u Myntri ka tnad pule puthi hynne ka sngi bad ngi la kyrpad ia u ba un shimkhia ban iakren bad u Myntri Rangbah ka jylla na ka bynta ban pynkiew noh mardor ia ka tulop jong ki nonghikai 4th Teacher ha ka jylla.”

Nalor kata u la ong ruh ba ki nonghikai 4th Teacher ki sngew bynniaw jur ia ka Sorkar Jylla namar ba ka tulop jong ki kam iahap satia bad kiwei pat ki nonghikai Upper Primary kiba dei na ki skul SSA ne Adhoc.

“Ngi dawa namar kata ia ka jingsiew kaba mar ka ryngkat na ka bynta ka jingtrei kaba mar kumjuh”, u la bynrap.

Nalor katta katkum ka jingpynpaw ka jong u la ong ba ia ka tulop jong ki nonghikai 4th Teacher la pynkiew khatduh na ka T.12000 sha ka T.18000 ha u snem 2022.