Dawa pynkynriah iaka ktem shipai BSF na Sonapyrdi

Syllad | The Rising MeghalayaOctober 29, 2019

KHLIEHRIAT: Ki nongialam shnong Sonapyrdi hapoh ka jingialam u bah Daiapherbha Lamare Secretary Shnong, u bah N. Mynthoi Chairman ka shnong Sonapyrdi ryngkat bad ka KSU Sonapyrdi Unit hapoh ka jingialam u General Secretary bah WD Gympad, bah KS Suchiang President KSU Narpuh Circle bad ka jingsynranlang ki dkhot na ka KSU Khliehriat Circle, ki la leit ia kynduh ia u Superintendent of Police (SP) East Jaiñtia Hills District halor ka jingbuh ktem shipai ki BSF ha shnong Sonapyrdi khlem ka jingtip ki bor shnong ne ki trai khyndew jong katei ka jaka ba buh ktem.

Ka dorbar shnong Sonapyrdi bad KSU ki la dawa ban pynkynriah shisyndon ia kitei ki shipai BSF na katei ka jaka namar ba ka jaka ba kine ki shipai kadei sha khappud ym ha pdeng shnong.

U Daiapherbha Lamare Secretary Shnong Sunapyrdi ula ong ba ki trai jaka ruh ki kyndit ban iohi da ki BSF ba thaw ktem ha jaka jong ki bad kila dawa ban pynkynriah ia kine ki shipai namar ba ki tieng ïaka jingleh heh ki shipai.

U SP Vivekanand Singh IPS haba pynshai ïaki nongialam shnong ka Sonapyrdi bad ka KSU ula ong ki BSF ki don ka bor ban pahara, hynrei ban shna ktem kim lah satia bad ula bthah ruh ïaki Pulit Lumshong ban jurip bad ban leh ïaka kaba donkam.

U KS Suchiang President KSU Narpuh Circle u la pynkynmaw ba ha ki snem ba mynshuwa ruh ki BSF kila pyrshang ban thaw ktem ha katei ka juh ka shnong, hynrei ka shnong ka la ujor sha ki bor synshar district bad la pynkynriah ia ki.

Ka jingbuh ktem jong ki ha kane ka shnong kam myntoi eiei bad ka pynsyier pynban ïaki nongshong shnong khamtam ki kynthei khynnah. Kine ki nongialam shnong kila pynkynmaw ruh ïaki kam ba la leh ki BSF mynshuwa ha kaba ki ktah kti ia ki trai shnong bad kren khlem akor ruh ia ki kynthei haba ki la dep buaid kyiad kaba la wanrah  jingklumar ha katei ka shnong.

Kumta kine ki nongialam shnong kila dawa na ka bor synshar district ban pynkynriah mardor ïa katei ka ktem shipai na katei ka shnong.