Dawa pynsangeh ka KSU iaka jingshna ktem Pulit Assam ha Saba

Syllad | The Rising MeghalayaApril 27, 2021

Ka KSU Nartiang circle kala dawa naka sorkar Meghalaya ban pynsangeh mardor iaka jingshna ktem pulit ka sorkar Assam haka shnong Saba kaba iaid shait shait wat hadien bala pynsangeh ka bor synshar district West Jaintia Hills.

Ka KSU Nartiang circle kala pynpaw ruh iaka jing sngewkhia halor ka jingshah tied shah bom ki dkhot ka UHM haki paid Karbi haduh bala kila mynsaw jur.

“Ka jingshlur ki paid Karbi ban thombor iaki paradoh parasnam jong ngi ka pyni ba kim salia ban klun iaki jaka puta wat la ka jaka ka hap hapoh u pud u sam ka Jylla,” ong u Chanbor War general secretary KSU Nartiang Circle.

Ka KSU Nartiang Circle kala dawa bad ban jur iaka sorkar MDA haka jing ialam u Conrad K Sangma ban tuklar bad ban pynsangeh mardor ia katei ka jingshna police out post ka sorkar Assam, lym kumta ka KSU kam banse ban shim da kiwei pat ki sienjam naka bynta ban iada ia ki paradoh parasnam ha katei ka thaiñ.