Dawa pynsangeh mardor ia ka jingtei Battalion Outpost ka Assam: JSM

Syllad | The Rising MeghalayaFebruary 25, 2019

JOWAI: Ka Jaintia Students Movement (JSM) Central Body ka la dawa ban pynsangeh mardor ia ka jingtei ia ka iing treikam jong ka Battalion Outpost jong ka ki pulit Assam ha Pom Dkhar kaba don ha Shnong Rtiang Sanphaw hajan Shnong Saitsama jong ka West Jaiñtia Hills District.

Ka JSM haka jingialam u President U Ma Leningstar Rymbai kala ai ia ka dorkhat sha u Deputy Commissioner West Jaiñtia Hills District Ma LSN Dykes Garod mynta ka sngi ban dawa ia ka jingtuklar jong u.

Katkum katei ka dorkhat, ka JSM ka ong ba ka Sorkar Assam ka ju mlien ban kyntur pud sha ka Jylla Meghalaya ha ka por elekshon ha ka por ba ki bor sorkar ka Meghalaya ki dang bunkam ban pynkhreh ia ka elekshon.

U Ma Rymbai ula ong ba katei ka jingshna ia ka iingtreikam jong ka ki pulit ka Battalion jong ka Assam ha Pom Dkhar ka long ka bym lah ban pdiang ha kano kano ka dur bad ka long ka khubor kaba pynher syrngiew ia ki nongshong shnong sha kitei ki thain.

“Ka jingshna ia ka Battalion Outpost ka long ka jingsdang jong ka kam trai jong ka Sorkar Assam hapoh u pud u sam jong ka Meghalaya bad lyngba katei ka Outpost ka Assam ka tehlakam ia kino kino ki jingpyrshah ia ki kam kyntur pud sha ka jylla jong ngi,” ong u President ka JSM.

U la ong ba kaba lyngngoh pat ka long ba ka jingshna ia katei ka Battalion Outpost ka long tang kumba 20 kilometer na ka Saitsama Outpost hynrei imat kim tip kaei kaba jia hapoh u pud u sam jong ka.

U Bah Rymbai u la ong ba lada katei ka jingtei ia ka Battalion Outpost ka iai shakhmat te khlem pep kan sa poi ka por ba kan sa long ha Langpih bad ka jylla Meghalaya kan hap ban bah khlieh.

U la iathuh ba ka jingiakynduh jong ki bad u DC ka long kaba seisoh namar u DC u la kular ban shim khia halor ka katei ka kam bad ban phah tohkit shwa halor katei ka jingjia.