Dawa pynshisha ka BJP na u Bah Pala halor ka jingkynnoh kren bein niam

Syllad | The Rising MeghalayaMarch 23, 2024

Da kaba shim ia ka jingkren kynthoh ba dang shen jong u nongialam Congress u Bah Vincent Pala pyrshah ia ka Bharatiya Janata Party (BJP) kum ka bym lah ban pdiang bad kaba ialam bakla ia u paidbah, ka Meghalaya BJP ka la dawa na une u MP ka Shillong ba un ai ki jingpynshisha halor kawei na ki jingjia kaba pyni ia ka jingbym burom jong ka BJP ia ki Balang ne Niam Khristan lem kumta u dei ban weng ne phaidien noh mardor na kane ka jingkren jong u. 

Ka BJP ka la kdew ruh halor kiba bun ki khep ha kaba u Myntri Rangbahduh ka ri da lade hi u la leit ban leh burom ha ki Iingmane bad ha ki kam bhalang jong ki Balang Khristan ba la pynlong da ki nongialam ka party ha ka Jylla, ong u kyrwoh na ka party.

Nalor kata ka party ka pynkynmaw ruh ia u Pala ba ha ka prokram rakhe Khristmas ba la pynlong ha ka iingsah u Myntri Rangbahduh Narandra Modi u la pyrto ia u Jisu Khrist bad ia ki jinghikai ki jong u.

Kumjuh ka State BJP ka pynkynmaw ruh ia baroh ba ha ka por rakhe Khristmas, ki nongialam ba halor jong ka party, kiba kynthup ia u Bah AL Hek bad kiwei kiwei ki la pynlong ia ki prokram lehkmen na ka bynta ki khynnah kiba wan na ki longiing kiba duk ba jynjar bad pynphuh pynphieng ia ka jingrakhe ha kylleng sawdong kaba long ruh mar khongpong ia kaei kaba la kynthoh da ki nongialam kum u Bah Pala.

Na ka liang u nongaiktien ka BJP u Bah Mariahom Kharkrang u la ong, “Ka Congress ka la sngewthuh shai bad ka la nanghiar bad duh bor katba nangiaid ki sngi katba ka bok jong ka BJP ka la nangkiew. Kiba kum kine ka jingkren kynthoh ki dei tang ki buit ban ioh vote sngewlem na ki paidbah namar ka jingkutlad. Ki paidbah ki la sakhi ia kiba kum kine ki jingialehkai mynta la slem bha bad kin kyrshah ia kita ki bym ktah ia ka niam, kata sha u/ka kyrtong ka BJP ha kane ka MP ilekshon ka ban wan.”