Dawa pynshisha ka KSU na ka CWC halor ka jingkynnoh donkti ha ka jingjia shah pyniap ha Ichamati

Syllad | The Rising MeghalayaMarch 31, 2024

Ka Khasi Students Union (KSU) haka 30 tarik Lber, ka la dawa na ka Coordination and Welfare Committee (CWC) Shella Block), East Khasi Hills ba ka dei ban pynshisha ha ryngkat ki sakhi satar halor ka jingkynnoh ia ka jingdonkti jong ka seng ha kaba iadei bad ka jingjia shah pyniap ba dang shen jong ki arngut ki bar Jylla kaba la jia hapoh Ichamati.

“Ka CWC ka la pynmih ia bunjait ki jingkynnoh pyrshah ia ka seng ha ka shithi sha u Myntri Rangbah ka Jylla. Ngi kob ia u Gopal Dey uba dei u president ka CWC Shella Block ba un wan shakhmat ban pynshisha ha ryngkat ki sakhi satar pyrshah ia ki dkhot jong ka KSU,” ong u General Secretay ka KSU u Bah Donald V Thabah.

U la ong ruh ba u Dey u dei u juh u briew uba la pynmih ia kijuh ki jingkynnoh pyrshah ia ka Seng ha u snem 2020 ha kaba iadei bad ka jingjia ha Ichamati ha kaba bun ngut na ki dkhot ka Seng ki la ngat ha ka jingshah thombor ha ki poiwir bad kaba la lam ruh sha ka jingjia shah pyniap jong uwei u dkhot napoh Sohra Circle u Circle (L) Lurshai Hynniewta.

U Thabah u la ong ba ka KSU ka phah ia ka khubor kaba shai sha ka CWC ba ka dei ban kiar mardor na kiba kum kine ki jingkynnoh kiba khlem nongrim namar na ka liang ka Seng kan ym shong klikti ne sngap jar halor kane ka bynta.

“Lada ka CWC ka sngew ba kim don ia ka jingsngewtynnad ban shong ban sah ha Meghalaya ki dei ban leitphai noh sha la ki jong ki jaka tynrai ba ki wan na Bangladesh bad ba ki lah ban leh katba ki mon ha la ka jong ka jaka. Hynrei katba ki dang shong dang sah hapoh ka Bri u Hynniewtrep jong ngi kan bha ia ki ba kim dei ban tuklar ia ki kam ki jong ngi,” ong u nongialam ka KSU da kaba bynrap ba ka Seng ka dawa na ka bynta ka jingpyntreikam ia ka ILP, ka Article 371, ka jingaibor ia ki District Council bad ka snem ot kyrteng ka dei ban long naduh ka 24 tarik u Lber 1971, bad kito kiba wan hadien kane dei ban pynphai pat ia ki shapoh Bangladesh.

Shuh shuh na ka liang ka KSU ka maham ruh ba lada kata ka Meghalaya Minority Linguistic Development Forum, kan pynlong jingiakhih ha Bri U Hynñiewtrep, ka KSU ruh kan pynlong lang da ki iakhih halor ka jingshah pyniap klep bad jingshah thombor ki Khasi na ka por sha ka por ha ki bar jylla.