Dawa pynshitom ka GTF halor ki jingtei ba beain kiba kyntur sha ka wah Thangsniang

Syllad | The Rising MeghalayaApril 28, 2024

Ka Green-Tech Foundation ha ka 27 tarik Iaiong, ka la dawa ban shim ia ki lad jingpynshitom halor ka jingmih jong ki jingtei kiba beain kiba kyntur sha ka wah Thangsniang ha Garoline Laitumkhrah, kumjuh halor ki jingtei kiba neh pura (permanent) hajan kane ka wah kiba hap ha u pud u sam hapdeng ka Nongrimbah bad ka shnong Nongrim Hills.

Ka GTF ka la dawa ruh ban pynlong ka jingtohkit pyrshah ia ki ophisar kiba la shah bad ailad ia kiba kum kine ki jingtei kiba beain bad ruh ban pynpra bad weng mardor ia baroh ki jait jingtei kiba don ha syndah jong kane ka Wah Thangsniang khamtam hapdeng u pud u sam jng ka Nongrimbah bad ka shnong Nongrim Hills.

Halor kane ka bynta ka Foundation ka la ujor ruh sha u Deputy Commissioner ka East Khasi Hills kumjuh sha ka Tnat Meghalaya State Pollution Control Board (MSPCB) bad ka Shillong Municipal Board (SMB).

Na ka liang u Chairman ka GTF u Bah HBN Nonglang u la ong ba ha ka jingleit jurip ha katei ka sngi la shem ruh ba ka jingpyntrei ia kawei ka iing hapoh Garoline, Laitumkhrah ka la tap lut ia ki bynta jong katei ka wah Thansniang. U la ong ruh ba kane ka jingtei ka la wanrah ka jingkyntur sha kane ka wah bad kaba long ruh pyrshah ia ka Water bodies Reservation and Preservation Guidelines 2023.

Nalor kata na ka liang ka Green Tech Foundation (GTF) kala byrngem ruh ban ujor sha Meghalaya High Court bad kumjuh sha ka National Green Tribunal (NGT) lada ki bor Sorkar Jylla kim shimkhia mardor halor ka jingshah tap ka Wah Thangsniang kaba don ha Garoline Laitumkhrah.

Utei u nongialam ka kynhun u la ong ruh ba ka jingmih kynsan jong kine ki jingtei ha syndah katei ka wah khamtam ha u pud u sam hapdeng ka Nongrimbah bad ka shnong Nongrim Hills, Shillong ka buh shibun u dak jingkylli, kata wat hadien ba ki la don ki kyndon kiba pyrkhing bad wat hadien ka Standing Order ba la pass da ka iingbishar High Court ka Meghalaya ha ka suo motu PIL No. 10 of 2019.