Dawa pynshitom ka HYC ia u heh pulit ka Pynursla ba ktah kti ia ki dkhot

Syllad | The Rising MeghalayaFebruary 26, 2024

Ka Seng Hynniewtrep Youths’ Council (HYC) haka 26 tarik Rymphang, ka la dawa ban pynshitom bad ban sospon mardor ia u 2nd officer in-charge ka Pynursla police station, u Bah George Dkhar halor ka jingkynnoh ktah kti ia ki dkhot ka Seng kiba thmu ban ujor halor ki kam khaii muid beain shapoh Bangladesh kaba la jia ha ka 24 tarik mynta u bnai.

Ha kajuh ka por ka HYC ka la phah ruh da ka jingujor ia kane ka kam thombor jong une u heh pulit sha ka Meghalaya Human Rights Commission (MHRC).

Ha ka shithi ujor sha u Superintendent of Police, East Khasi Hills, u president ka HYC Central Body, Bah Roy Kupar Synrem u la ong, “Ngi dawa jur ban pynlong ka jingtohkit bad ban pynshitom katkum ka ain pyrshah ia kane ka kam thombor jong une u heh pulit pyrshah ia ki dkhot ka Seng. Ngi dawa ruh ba dei ban sospon mardor ia u katba ka jingtohkit ka dang iaid shakhmat.”

U Bah Synrem u la ong ba ha katei ka 24 tarik Rymphang, ki dkhot ka seng HYC Ri War Mihngi Circle (Pynursla Sub-division) hapoh ka jingialam u president jong ka u Lamphrang Khonglam ha ryngkat hynriew ngut ki dkhot ki la ioh ban bat ia artylli ki trok kiba kit ia ki muid bad ia kiba la thmu ban shalan beain shapoh Bangladesh.

Hadien ba ki la bat noh ia kine ki trok ki la ialam noh shapoh Pynursla Police Station da ka jingthmu ban ujor ejahar bad ban kyntu ia ki pulit ban leh ia kaba donkam katkum ka ain.

Hynrei la ong na ka liang ki bor pulit hapoh ka jingialam jong u In-charge u Bah George Dkhar ha ka jaka ban sngap ia ka jingujor ka jong kine u dkhot bad ban rejistar ejahar u la sdang pynban ban kren tohmet ia ki bad ban patan ia u  Lamphrang Khonglam shapoh police station bad thombor ia u kat haduh ba un da mynsaw.

Nalor kata une u incharge la kynnoh ba u la thombor ruh ia kiwei pat ki dkhot jong ka seng hapoh police station bad byrthen ruh ia ki ban leh da kaba tyngeh namar ka jingbat ia kine ki kali. La ong ruh ba une u heh pulit u la thombor ia kine ki dkhot ym tang da ka kti hynrei ruh da u dieng lathi bad knieh noh ruh ia ki jingdon jingsat jong ki, kum ki mobile phone, bek pisa bad kiwei kiwei, ong katei ka shithi ujor.

Na ka liang u Bah Synrem u la ong ba kane ka jingleh jong utei u heh pulit ka dei ka jingpyndonkam bakla ia ka bor pyrshah ia ki riew paidbah bad ia kaba dei ban pynrem jur. Kumta ka HYC ka dawa jur ban pynshitom pyrshah ia une u heh pulit bad ia kiwei pat kiba donkti ha kane ka kam thombor.