Dawa pynshitom ka NESO ia ki shipai Para (SF) ba pyniap briew pathar ha Oting

Syllad | The Rising MeghalayaSeptember 23, 2024

Ka North East Students Organization (NESO) ha ka 23 tarik Nailur ka la dawa na ka Sorkar Pdeng ba kan pynngat mardor ia ki shipai ka 21 Para (SF) ha ki kyndon ain namar ka jingdonkti ha ka kam pyniap briew pathar ha ka shnong Oting, Nagaland khnang ban pynioh ia ka jingbishar hok na ka bynta kine ki lanot bad kiba haiing hasem jong ki.

“Ngi ban biang ruh ia ka jingdawa ba la slem ba la sahteng ka jong ngi ban weng bad pyndam noh syndon ia ka AFSPA ha ka thain Shatei Lammihngi, kata ka ain ka bym don jaka ha ka ri synshar paidbah. Ka jingpulom ban leh ia kane kan nangwanrah ia ka jingbym shaniah bad ki kam iaumsnam hapoh ka thain,” ong u Chairman ka NESO u Bah Samuel B Jyrwa lyngba u kyrwoh.

Kane ka la wan long ruh hadien ka rai ba dang shen jong ka Iingbishar Supreme Court jong ka ri India ha kaba iadei bad ka jingjia shah pyniap pathar jong ki briew ha ka shnong Oting.

Kane ka jingjia ba sngewsih kaba la jia ha ka 4 tarik u Nohprah 2021 ha Mon district ka Nagaland la sakhi halor ka jingshah pyniap dusmon jong ki 14 ngut ki riew paidbah ba lui lui ha ki shipai ka 21Para (SF) jong ka tnad shipai India.

Hynrei, wat hapdeng ki sakhi satar kiba bun ia kaba la lap da ka kynhun tohkit ba kyrpang na ka Tnad Special Investigation Team (SIT), ka Supreme Court ha ka 17 tarik Nailur 2024 la ong ba ka la pynkut noh ia ka jingshim bishar pyrshah ia kine ki shipai kiba la shah kynnoh donkti ha kane ka kam pyniap dusmon.

 “Kane ka jingshim rai ka dei ka jingkyntait pura ia ka hok jong ki lanot bad kiba haiing hasem jong ki kiba dang iai ap ban ioh ia ka jingbishar hok. Ka SIT ba la thaw da ka sorkar Nagaland kaba la pynlong ia ka jingtohkit kaba bniah halor kane ka jingjia ka la lap ia ki sakhi satar kiba biang ban pynngat ia ki 30 ngut ki dkhot jong ka 21 Para (SF) kaba kynthup ia ki heh shipai halor kane ka kam pyniap ha Oting. Ia ka Chargesheet la ai ruh sha ka District bad Sessions Court jong ka Mon, hynrei ka Sorkar Pdeng ka la kyntait ban shim ia ki lad jingpynshitom pyrshah ia kine ki shipai ba donkti. Kane ka jingbym shimkhia kam shym la suitniew ia ki lynti jong ka ain bad khein kamkai ia ki kyndon ain khamtam ha kane ka thain Shatei Lammihngi ha kaba la sakhi ia ka hisoti jong ki kam leh shiliang khmat kila iehnoh ia ki dak mong kiba jylliew,” ong u Bah Samuel Jyrwa.

 “Ka jingshim rai jong ka Supreme Court ka la nangpynjur ia ka jingsngew shah banbein jong ki nongshong shnong ka thain Shatei Lammihngi, khamtam lei lei hadien ba ka iingbishar dalade ka la kam ba kadei ka kam kaba lah ban iaid shakhmat lada ka Sorkar Pdeng ka aijingbit ban pynngat ha ki kyndon ain. Kane ka jingialehkai jong ki bor synshar ka pynpaw ia ka dak kaba shyrkhei ba  ka jingim jong ki riew paidbah, khamtam kito kiba na ki nongshah kyntait bad kiba ju shah iehnoh beiñ. “Ia ka thaiñ Shatei Lammihngi la pynhap hapoh jong ka aiñ iakjakor jong ki shipai (AFSPA),” u la bynrap.

Nalor kata u Bah Samuel u pyntip ruh ba man ka por ka NESO ba ki kynhun jong ka ki la iai dawa na ka bynta ban pynduh noh ia ka AFSPA, ka ain kaba dang iai bteng ban pynneh ia ki kam thombor bad ki kam pyntriem kiba pynkhein ia ki hok longbriew manbriew ha ka thain Shatei Lammihngi baroh kawei.