Dawa pynshitom u MDC ka BJP ia ki agent kiba shim pisa na ki nongioh jingmyntoi lyngba ki skhim sorkar pdeng

Syllad | The Rising MeghalayaNovember 6, 2023

U MDC ka Seng BJP na Tura, u Bernard N Marak u la dawa ban pynshitom tyngeh pyrshah ia kito ki briew ne agent kiba shim pisa na ki nongioh jingmyntoi lyngba ka jingpyntreikam ia ki skhim bapher bapher ka Sorkar Pdeng.

Ha ka shithi sha ki Deputy Commissioner jong ki santylli ki district ka thain Garo Hills, u Marak u la ong ba ki skhim ka sorkar pdeng kim don ka jingiadei ba ki MLA jong ki thain, kumta u la ong ba ki MLA bad ki briew jong ki kim dei satia ban mushlia ha kaba iadei bad ka pyntreikam ia ki skhim ka sorkar pdeng.

“Ki Secretary jong ki VEC ha ki katto katne ki shnong ki trei kum ki agent jong ki sain hima, ia kaba ym dei satia ban pynshlur da lei lei ruh. Ki Secretary ki VEC bad ki Gram Sevak ki dei ban trei katkum ki kyndon kiba iadei bad ki skhim ka sorkar pdeng. Dei ban pynshitom tyngeh pyrshah ia kito ki briew ne agent kiba dawa pisa na ki nongioh jingmyntoi, namar kine ki skhim ki dei ki bym donkam jinglut ei ei ruh,” u la ong.

U Marak u la pynpaw ruh ba ka mat kaba sngewkhia ka long ba kiba bun ki briew ha ki thain nongkyndong ki pyrkhat ba ka Aadhaar card u don ka jingiadei bad u ‘666’ bad ki bank ruh kim pyniasoh ia ki nongioh jingmyntoi lyngba ki bank account jong ki bad ka Aadhaar card.

“Kane ka la wanrah ka jingeh kaba khraw ha kaba iadei bad ki jingsiew kiba iaid lyngba u Aadhaar sha ki nongioh jingmyntoi. Dei ban kyrpad ia ki bank ba kin pyniasoh ne lin ia u Aadhaar sha ki account jong ki nongioh jingmyntoi. Hapoh South Garo Hills, ka dei ban don ka bank bad ka jingpyniasoh lyngba ka mobile ha Rongara bad shawei pat namar ba ki nongioh jingmyntoi na kito ki block ki hap ban iaid haduh kumbba 80 kilomitar shapoh Baghmara na ka bynta ban pyndep ia ki kam ki jam jong ki,” ong u Marak.

Nalor kata u la ong ruh ba ha ka jingleit jurip ka jong u lashem ba ym shym la don na ki block bad ki VEC ki ban pyni ia ki permanent waitlist kumba la kdew hapoh ki kyndon kaba la wanrah ka jingartatien bad ka jingsngewthuh bakla bad kaba lam sha ka jingshah pyndonkam bakla jong ki nongioh jingmyntoi da kito ki agent kiba don ha ki ia ki permanent waitlist.

“Kine ki agent ki la pynbor ia ki nongioh jingmyntoi kiba wan na ki longiing baduk ba kin hap ban siew shibun ka pisa na ka bynta ban ioh ia ka skhim kaba ym donkam jinglut  na ka bynta jong ki. Ngin jin da la sngewnguh lada ia kine ki permanent waitlist yn buh mardor hapoh ki block bad ki shnong ki thaw. Ngin bishar bniah ia ki sienjam ba lashim hapoh ka shitaiew,” ong u Marak da kaba bynrap ruh ba ki Block ha kiba buntylli ki district ki dei kiba duna nongtrei. Ka jingbym biang ki jaka treikam, ka bording bad ka jingduna ki jingtreikam lyngba ki tiar digital ruh ki dei ki mat ha kiba bun tylli ki block.

Nalor kata u la ong ruh ba ki jingsiew kiba iadei bad ka jingpyntreikam ia ka skhim MGNREGA ki la shu sahkut bad kiba bun ki jingsiew ki la iaid lait ha kiba bun tylli ki VEC ha ka por ba leh ia ka online upload.

Shuh shuh une u MDC ka Tura u la ong ruh ba kiba bun ki shnong ki bym pat ioh ia ka jingpyniasoh lyngba ka mobile ia kiba donkam ban ithuh bad ban leh ia kaba donkam ban pyniasoh kloi katba lah. U la ong ba na ka liang ki longkmie ruh ki la ujor halor ka jingbym ailad ban ialam ia ki VEC namar ka jingbym pynlong ia ki ilekshon ha ka rukom kaba dei. Kumta u kyntu jur ia ki bor pyniaid district ba kin shimkhia mardor halor ki mat kiba iadei bad ki VEC bad ha kaba iadei bad ki jingsiew jong ki.