Dawa pyntreikam ka KSU ia ki 17 tylli ki mat ban pynkylla dur ia ka jingtreikam ka DSC- EJH

Syllad | The Rising MeghalayaOctober 11, 2024

Ka Khasi Students’ Union (KSU) East Jaintia Hills Unit ka la aiti da ka jingthoh sha u Chairman ka District Selection Committee (DSC) ka EJH ban dawa pyntreikam ia ki 17 tylli ki mat aijingmut ban pynkylla dur ia ka DSC na ka bynta ka jingkhuid jingsuba ha ka jingthungkam thung jam, ka jinglah treikam bha bad kaba lah ban ioh ia ka jingshaniah.

Kine ki jingdawa ki kynthup halor ka jingthung ia ki riew shemphang ki bym dei ki ophisar sorkar kum ki Vice Chairman kumjuh ki dkhot jong ka DSC bad ki bym don ka jingiadei bad ka sain pyrthei, ka jingpynbna ba man u snem ia ki jingdon jingem ki nongtrei sorkar.

Ha kaba iadei pat ki nongthep kam, ka KSU kala ong ba ki nongaplai ki dei ban long tang kiba shong ba sah ha Meghalaya bad kiba nang ia ka ktien Khasi na ka bynta kino kino ki post hapoh ka DSC, ban lah ban aplai ia kano kano ka kam ha ka DSC ha Khasi bad Jaintia Hills, ka jingthung ia ki adhoc/ Contractual/Casual dei ban kiar.

Dei ban don iaka calendar ba man u snem kaba kynthup ia ki tarik ba kongsan na ka bynta ban pynlong ia ki eksam dei ban pynmih da ka DSC, dei ban pynbna paidbah ia ki mark jong kiba iakhun ia ki eksam, ia ki roll nombor jong ki candidate lane kino kino ki jingpynkylla kim dei ban jia hapdeng ka jingpynung kam, dei ban ai i ki carbon jong ka OMR sheet sha ki candidate ba iakhun ia ki eksam, ka jingpyllait ia ki answer key hadien ka eksam bad ban ai por kaba biang ban tuklar halor ki answer key.

Ka jingpynrung kam dei ban pyndep hapoh ka hynriew bnai naduh ka tarik ba pynmih ia ka jingpynbna, ka jingpynduh noh ia ka personal interview na ka bynta ki Grade B, C bad D, ka jingai report ba shisien shi snem da ka DSC, ki kot jingkylli ki dei ban long kiba kyrpang ban khanglad na ka jinglait tuh.

Dei ban thaw ia ka Grievances Cell ha ka DSC, ka jingleh test lyngba ki computer ha ki por ki ban wan, ka jingkhang ia ka internet ha ka por eksam bad ka jingbuh ia ki CCTV camera hapoh ki kamra thoh eksam.

Ka KSU ka la ong ruh ba ka long kaba donkam ban pynkylla thymmai pura ia ka rukom thungkam jong ka DSC na ka bynta ki post bapher bapher hapoh ka district namar katba nangmih ki sngi, ki la nang paw shai ba ki don ki jingduna bad ki jingbym iahap ha kane ka rukom treikam kaba mynta kaba khanglad ban jied ia kiba tbit tam, bad kaba lam sha ka jingduh jingshaniah hapdeng ki nongaplai kam bad hapdeng ki paidbah hi baroh.

“Kawei na ki bynta ba kongsan kaba donkam mardor ban phaikhmat ka long halor ka jingbym shai ha ki rukom thungkam. Ka jinglong kaba shai ka long kaba kongsan bha ban pynneh ia ka jingshaniah bad ka jinglong hok ha ka rukom jied. Ka pynthikna ba baroh ki rai ki long kiba hok bad katkum ka jinglah, ka ban pynioh ia ka jingshaniah ha ka jingtreikam jong ka DSC.Ka jingpyntreikam ia ki rukom treikam kiba shai kum ka jingbatai shai ia ki kyndon ha kaba jied, ban pynlong ia ka rukom bishar bniah kaba da pynleit jingmut bad ban ai ia ki jingpynbna ha ka por kaba biang sha baroh ki nongiashim bynta, kan iarap sibun ha kaban kyntiew ia ka jingtreikam bad ka nam jong ka committee hi baroh kawei,” ong ka KSU lyngba ka jingthoh.

“Nalor kata, ka jingpynthymmai ia ka rukom thungkam jong ka DSC ka long kaba donkam ban pyniahap bad ki kyndon bad ki rukom treikam jong kane ka juk kaba mynta.Kane ka kynthup halor ka jingpynthymmai ia ki jingbatai ban pyni ia ki jingdonkam kiba nangkiew , ban pynbeit ia ki rukom aplai bad bishar bniah, ban pynrung ia ki lad ki lynti ban iada na ki jingleh shiliang khmat,” bynrap ka Seng da kaba ong ruh, “Ka jingpdiang ia kine ki jingkylla ka DSC ka lah ban kyntiew ia ka jinglah jong ka ban khring bad jied ia ki briew kiba tbit tam, bad kane kan aijingmyntoi ia ka district da kaba pynthikna ba ki briew kiba tbit kin shah thung ha ki kam kiba kongsan.

“Kumta ngi kyntu jur ia phi ban pyrkhat khia ia kine ki jingai jingmut bad ban shim ia ki sienjam kiba donkam ban wanrah jingkylla ia ka DSC sha ka jaka treikam kaba shai, kaba kham tbit bad kaba lah ban shaniah. Da kaba leh kumta ngi lah ban pynneh ia ki nongrim jong ka ‘meritocracy’ bad ka jinglong hok ha ka rukom thungkam jong ngi, da kaba shakri na ka bynta ka bha ka miat bad ka jingmyntoi jong ka District jong ngi bad ki nongshong shnong jong ka,” bynrap shuh shuh ka KSU ha ka shithi.