Dawa shna pynbha ka KSU iaka Kiang Nangbah College

Syllad | The Rising MeghalayaSeptember 28, 2020

Ka Khasi Student Union (KSU) Jaintia Hills ryngkat ka KSU Jowai Circle ki la dawa na ka sorkar Jylla ban pynbha bad maramot iaka baroh ki jingtei ka Kiangbah Nangbah Government College, Jowai.

Kane ka jingdawa ka KSU ka dei hadien ba kala wan jurip iaka building ka kolej haka sngi Nyngkong bad la lap ba kala pei um ka iing building ba shong klas ki khynnah pule Science bad kiwei kiwei ki kamra klas. Ka building jong kane ka kolej kala donkam ban maramot nadong shadong naduh ki sad, ki jingkhang ïit, ki sawdong sawkun ka jaka pule bad ban pynthymmai iaki tiar ki tar hapoh ka Laboratory katkum ka juk kaba mynta.

Ha kane ka jingleit jurip ka KSU la ialam u Education Secretary u Justice Paul Lyngdoh, u Leningard Tariang Organising Secretary KSU-JH bad ki dkhot ka KSU na ka Jowai Circle.

U Justice Paul Lyngdoh haba iakren bad ki lad pathai khubor hadien ka jingjurip ula ong “Ka Kiang Nangbah Government College kadei ka shlem ai jinghikai kaba la rim tam kaba la ai jingshakri la 53 tylli ki snem ïaki samla ka thaiñ rilum Jaintia haka liang ka jingnang jingstad. Hynrei ka jinglong jingman jong ka jaka pule ka donkam ban maramot kyrkieh ia baroh ki building jong ka khnang ban myntoi ki samla pule jong ka Kiang Nangbah Government College,” la ong u Justice Paul Lyngdoh.

“Ha Science Block ngi la lap ba ki sad ne ceiling ki long kiba la shong synjor namar ka jingiohlad ka um ban rung haka por slap. Ki jingkhang ïit ruh kila pait lut, ka Canteen ka la jot bad ruh ban pynbha iaki sawdong sawkun jong ka Kiang Nangbah College,” la ong u Paul.

Shuh shuh u Paul ula ong ba kila pynkhreh ban leit iakynduh ia u Myntri ka tnad pule puthi ka sorkar Jylla u Lahkmen Rymbui bad ban aiti ruh ha u iaka dorkhat ha kaba iadei ban shna thymmai bad maramot noh ia baroh ki jingtei ka Kiang Nangbah Government College.